港超聯·東方｜文奴托利斯新賽季執教三場即下課 東方首席顧問游永強：連贏波都有巨大隱憂

東方今季港超聯起步不順，開季先遇兩連敗，直至上仗才以4:0大勝和富九龍城。正當外界以為東方重回正軌之際，球隊卻於8日宣布主帥文奴托利斯及其教練團隊離任。球會首席顧問游永強表示，球隊雖然贏波但依舊存在巨大隱憂，雙方理念亦有分歧，因而作出此決定。

文奴托利斯開季三場即離任

文奴托利斯上季季中接替離隊的盧比度執掌東方教鞭，最終帶領球隊以第四名完成港超聯賽事，表現尚算不俗。然而東方今季開季即爆冷以1:2不敵升班馬至尊沙田，隨後再以1:4大敗予大埔，直至上仗才以4:0擊敗和富九龍城取得今季首勝。不過，東方隨後於8日宣布文奴托利斯、助教沙蘭奴、體能教練查維亞賓拿雲及球隊分析員戴亞斯離任，暫由助教高尼路代任主教練一職，消息引起球迷廣泛討論。

游永強：雙方理念不合

球會首席顧問游永強周四出席東方女子足球隊成立記者會時，就易帥事件作出回應。他指出：「可以咁講危中有機，機中有危。最主要就係，文奴嘅理念係好嘅，所以點解當初我哋都根據佢嘅諗法投入咗一啲資源落去啦，特別數據分析各方面。但係有時喺一個長遠嘅對於會嘅要求、睇法，或者喺某一方面，可能同我哋當初嘅有啲諗法唔一樣。」

談到球隊在剛取得一場大勝後為何仍作出換帥決定，游永強坦言雖然大勝九龍城，但他依然察覺到球隊防線有巨大隱憂：「人哋一打反擊我哋就『穿』，我諗幾場都係啦。呢個係一個隱憂，我哋希望可以溝通嘅時候亦都希望有個改善。就算我哋去對九龍城嗰場係贏到幾球，但係你睇到其實有幾次係『空晒』喺後面，不過係對方把握唔到。」

游永強強調易帥並無所謂對錯，亦肯定文奴托利斯團隊帶來的數據化分析對球隊有所助益，純粹在戰術理念上出現分歧。他提到東方過往打法較注重防守，但現時戰術「有前冇後」，未能發揮預期效果：「而家佢嘅打法係叫做『有前冇後』，最主要係我哋都要睇到球員跟唔跟得上。如果我前面個前鋒好勁嘅，人哋攻入四球五球，但我前面入到七球八球，我梗係無所謂啦。」

至於物色新主帥的進展，游永強透露目前已收到約30份履歷，期望今個周末能篩選出合適人選再作決定；他又補充目前陣中球員具備一定質素，因此暫未會對球員陣容作出調整。

記者／攝影：魏國謙