名古屋亞運｜港隊男足操練未齊腳 主教練曾昭達透露賽前一日先齊人
愛知名古屋亞運2026距離開幕進入倒數階段，港隊U23男足周一在賽馬會香港足球總會足球訓練中心進行操練，主教練曾昭達指因為球員同時需要參與聯賽，所以訓練比較聚焦在戰術和灌輸一些心態上的東西；而從中超歸隊的顏卓彬則表示上次未有隨隊出戰因此都好珍惜今次機會，並以晉級為目標。
港隊賽前操練未齊腳
港隊已在上星期進行三日訓練，但今日操練仍未齊腳，秦宇灝因出戰U20亞洲盃今日才回港，連同同樣今日抵港效力中超重慶銅梁龍的吳宇熙明日加入操練，效力中甲的馬希偉則要在13日出發當天才可歸隊，而征戰美國NCAA聯賽的曾樂圖則預計周四回歸。
由於還未齊人因此教練團成員亦要親自落場和球員一同操練，今次領軍的曾昭達透露球隊將於13日下午啟程，但九龍城和北區的球員因為有聯賽的賽事因此14日才出發，所以預計15日才齊人，港隊首場賽事在16日對上日本。
曾昭達無奈時間有限 盡力衝最佳
達sir也坦言因為時間有限加上球員也有球會的訓練和聯賽，所以未必可以做到太多東西，主要針對戰術和心態上的東西：「我諗最緊要灌輸畀大家係心態上面嘅嘢，即係足球冇嘢冇可能嘅，喺我嘅字典入面。我都有同佢哋講，大家盡力踢我覺得最緊要。即係我希望佢哋放眼嘅係借鏡上年嘅亞運嘅表現，好多球員踢完亞運嘅比賽都出外發展，，我相信佢哋都可以做得到，呢個我覺得緊要啲。」
而提到訓練成效，達sir表示要上場才知道確切成效，但認為球員有了解到大致的部署：「我喺度我都多謝球員，因為每次練都會開會先，可能睇片同埋喺球場嘅時間差唔多係六四開，咁佢哋都用好多時間去睇同傾。我諗有成效要喺比賽上面先知，但係我諗同佢哋傾或者接觸時佢哋都明嘅。」而提到備戰是否充足時，達sir笑指「其實點都唔夠」，他表示因為早前集訓也不是他帶隊，和球員接觸的時間也不足，所以都是盡力做好。
顏卓彬未對四強佳績感壓力 踏實先望出線
而上屆杭州亞運獲補選，但未有隨隊出戰的顏卓彬今屆迎來首次的亞運征途，他指因為亞運4年才有一屆，所以很珍惜今次的機會和很高興可以入選，而被問到不少球員還未歸隊會否影響到狀態和部署時，彬仔則認為對狀態影響不大因為都有所屬球會的訓練，可能在部署上會有影響：「部署上就一定有少少影響嘅，好似我哋都唔夠人踢分隊賽，但係都冇辦法煮到埋嚟就食啦。」他補充：「我哋而家未歸隊嗰啲全部都係踢中超、中甲嘅，佢哋全部都喺上面一個高強度練波同比賽嘅地方。我相信返到嚟純粹係默契上或者戰術上需要少少時間磨合。但今個禮拜陸陸續續大家都會返嚟，希望大家到時踢到一場好嘅比賽畀大家睇。」
今屆港隊被分入A組與日本、泰國和吉爾吉斯一組，上屆香港歷史性闖入亞運四強，被問到會不會因此有壓力時彬仔則坦言並沒有，先主要聚焦於出線：「講真其實真係冇乜壓力。但係我哋個目標係出線先。因為上年入到四強剛好有人退隊、我哋啲人發揮得好好，同埋喺杭州踢，有好多球迷睇，所有嘢加加埋埋先入到四強，真係好難先做到嘅事。所以今屆我哋踏實啲，望出線先。望出線一步一步，踢好每一場比賽，冇保留咁樣打每一場硬仗。」
記者/攝影：魏國謙