近七旬患病保安遭裁員 臨別聽信經理「做咗呢步」 2萬遣散費慘被設局凍過水｜Juicy叮

一名網民在社交平台發帖代其年近七旬「肺有事」的父親求助，指其父在保安公司任職兩年半，因公司「cut位」而被裁，卻在臨別前誤信上司的「溫柔勸退」，自行發出WhatsApp辭職訊息。最終「好離好去」變成了「痛失遣散費」，事件隨即引發大批網民熱烈討論。

「好離好去」成溫柔陷阱？老實保安爸中計

根據樓主透露，其父親今年已是「六十尾」的高齡，在該保安公司任職了兩年半。本月初，公司突然以「裁員（cut位）」為由，並以其父親「年紀最大」為藉口決定解僱他。然而，正當準備離職之際，其上司卻展開了「人情牌」攻勢。

樓主在帖文中憶述：「佢上頭打電話氹佢，話可唔可以自己whatapps講自願離職。老豆又一心諗住好離好去，就月中打完電話自己下一日whatapps自己提出離職申請。」

這名老實的保安爸爸不疑有詐，於9月中在WhatsApp提出了離職，並以9月30日為最後工作天，直至近日向家人提起，樓主才驚覺大事不妙，直呼：「我就知Ｘ街啦，公司係唔想俾遣散費我老豆！」

令人憤怒的是，當樓主試圖向公司經理理論時，對方態度卻180度轉變，經理不但堅稱是因為其父「工作表現差而炒，已經請咗新人」，更手握黑字白紙的WhatsApp離職通知作為免責金牌。樓主痛心表示，父親本身「肺有事」，連那僅約兩萬元的遣散費都要被呃，怒斥公司：「幫公司慳呢啲陰質錢，老老實實都要俾人壓榨！」

網民反應兩極：有字據難追 vs 企硬報《東張》

帖文引來大批熱心網民「開班授徒」與聲討，部分網民抱持悲觀態度，認為黑字白紙確實難以推翻：「員工自己提出左離職，就唔屬於遣散了。Whatsapp msg已經black & white，無嘅啦。」「上司用電話講，無紀錄，難證明佢叫你爸辭職……對方死口唔認既，機會好微。明顯公司玩慣玩熟。」「自動離職係無錢賠嘅，佢自己走就咩都冇得補。」

有網民點出，即使能追回，在強積金對沖機制下可能也所剩無幾：「就算係公司跟規矩炒佢，都一樣可以用僱主供款對沖佢份遣散費同長期服務金㗎咋。」

不過，更多網民對保安公司的行徑感到齒冷，強烈建議樓主「企硬」爭取到底，並紛紛獻計，包括有網民建議樓主照上勞工處開File：「我老豆一樣 case，最後去勞工處開 case 間公司立即縮。」、「照去勞工處立案先，我都試過畀人勸退，我話依家係『被自願離職』，『唔係我自願離職』。」

有網民則建議搜集證據「裝彈弓」：「你而家唯一可試就係裝佢，打電話錄音，睇佢會唔會爆話當初係佢提出要你爸辭職。」、「記得所有對話由依家開始都要錄音、文字要 screen caps！」

有網民亦建議尋求傳媒及工會協助：「報東張西望，到時佢就麻煩，睇佢點同公司交代。」、「邊間保安公司咁PK，開名就可以！」，有工會人士亦主動留言：「有需要就 pm 我，我係跟保安工會，多年個案經驗。」樓主已即時表示PM聯絡。

根據本港《僱傭條例》，僱員按連續性合約受僱不少於24個月，因裁員而遭解僱，便合資格獲得遣散費。

來源：Threads