元朗虐兒案｜2歲女疑遭印傭監生撳手落滾水 皮開肉綻狂流血膿 母痛心誓言告到底
元朗蝦尾新村一名2歲大女童懷疑被印傭虐待，導致雙手二級燒傷，現時在屯門醫院留醫。《星島頭條》聯絡到女童的母親胡小姐，她指自意外發生後，女兒的雙手不斷滲出血水，令她非常痛心，「啲血水不斷流，流到成張床都係，係冇停過，同埋流啲膿出嚟，隻手全部都係紅色，係冇晒皮，淨係得啲肉」。她直斥涉事外傭不斷講大話，對自己及警方解說事件時前面不對後語，「我覺得你博炒你都唔好咁過份，攞小朋友嚟搞啦…我一定會追究到底」。
胡小姐指自己與丈夫屬雙職家庭，需要聘請印傭照顧兩名幼童。涉事外傭今年3月30日入職，至今逾4個月。她昨日（19日）下午2時半出門上班，至3時18分收到外傭通知，聲稱煮食期間女兒攀爬並扯跌麵煲，導致雙手被燙傷。她立即通知住在樓下的朋友，協助將女兒送往醫院治理。
她趕到醫院查看女兒傷勢，發現雙手嚴重紅腫且傷口平整，認為絕非意外造成，加上女傭非常淡定，完全沒有關心女童的情況，令她起疑，「問佢點解會搞到咁，佢一直唔出聲，到警察嚟再問佢，佢嘅解釋就係佢去屙屎，所以帶埋我個女入去，話我個女自己擒高去開水龍頭然後淥到，但我個女得78cm，係唔夠高擒上個洗手盤，亦都唔夠高開沖涼房個水龍頭」。
其後女傭的解釋更令人咋舌，「佢話驚我個仔同個女打交，所以喺沖涼房開咗盤水俾我個女玩，但未試水溫，我個女已經插咗入隻手落去，啲水咁熱咁辣手都即刻縮啦，嗰個傷勢絕對唔係一秒嘅事，同埋個傷口係齊齊整整，好明顯係夾硬㩒落去」。
CCTV揭恐怖真相：拖入浴室6分鐘 淡定取冰企圖私了
面對外傭一個大話冚一個大話，胡小姐感到非常憤怒，隨即翻查家中的閉路電視片段，揭穿外傭在事發時段根本沒有開爐煮食，而是將女童拖入廁所，6分鐘後才出來，「佢抱我個女出嚟嗰陣，我個女已經爆喊，佢兩隻手已經係紅晒」。更令她心寒的是，外傭離開廁所後第一時間竟是開雪櫃取冰，企圖自行「處理」，足足拖延近20分鐘才通知她。
胡小姐續指，女兒的身上出現不同的傷勢，包括額頭有瘀傷，下體亦有指甲痕，但最讓她痛心的還是小小的雙手皮開肉綻，「啲血水不斷流，流到成張床都係，係冇停過，同埋流啲膿出嚟，隻手全部都係紅色，係冇晒皮，淨係得啲肉，今日晏晝仲發高燒」。由於女兒年紀尚輕，雙手會經常郁動，如要進行植皮手術，需與多名醫生一同商討意見，目前只能繼續留院觀察。
僱主自覺待外傭不薄 誓言追究到底
胡小姐更指約一個月前曾發現兒子的額頭及身體出現瘀傷，當時外傭聲稱是男童玩耍時自行撞到，她亦不以為意，如今細想懷疑一對子女早前已持續受虐。被問到女傭平日的為人，胡小姐指對方曾於台灣工作，來港僅4個月，雖曾目擊女傭強迫女兒進食，兒子哭鬧時會發脾氣掟物件，但在她面前表現良好，而她亦自問對對方不薄，包括代付數百元身份證費用及包辦所有生活用品，「我唔明點解佢要咁樣對我小朋友，我覺得你博炒你都唔好咁過份，攞小朋友嚟搞啦」。
經歷今次慘痛教訓，胡小姐表示極度心痛及憤怒，揚言日後絕對不會再聘請外傭，並強調不會放過肇事者：「成日話加人工，加完人工畀你咁又點？到頭嚟，你啲外傭嚟虐待我個女，會唔會殘忍咗少少？呢個唔係人嘅行為，真係好無性。啲小朋友咁可愛冇得罪你，我個女仲要好乖唔扭計，我一定唔會放過佢，一定要告佢告到底。」