借錢黨新招殺入屯門 自稱我來自巴西 騙徒靠一表現呃走港女$600｜Juicy叮
「借錢黨」又有新招。一名懷疑騙子早前在屯門西鐵站附近自稱「我來自巴西」但「提款卡攞唔到錢」，因為一個表現，在街頭成功向一名好心港女借得600元。女事主事後坦言「有少少怯，覺得可能中咗伏」。
回應的網民大多認為不是「可能中伏」，而是經已「中伏」，安慰樓主當買六合彩做善事、破財擋災之餘，還教應對方法；有人更順便自爆遇上懷疑騙徒的經歷警世。
facebook群組「屯門友」版主早前代街坊發帖，講述事發經過，詳情見下圖及下文：
借錢黨新招殺入屯門逐張睇↓↓↓↓
女事主：見佢好誠懇就信咗佢
女事主指：「頭先喺屯門西鐵站，有個大陸操北方口音嘅中年男人聲稱自己提款卡攞唔到錢，仲親身去花旗提款機示範俾我睇。佢話自己喺巴西嚟香港做生意，唔係迫不得已都唔會問我一個女仔借錢。我見佢好誠懇就信咗佢，話聽日中午佢朋友就會過返數俾我。但而家有少少怯，覺得可能中咗伏。我借咗600俾佢食飯+住酒店」。
回應的網民心水清地指「咁都信」、「耳仔咁軟？」、「應該凍過水了」、「$600買個知識」、「當破財擋災啦！」、「原來真係會有人信」、「橋唔怕舊最緊要有人受」、「財到光棍手，一去無回頭」。
網民接著好心教路「我會打999幫佢」、「一見到即刻掉頭走啦，佢再講即刻話報警或者同佢去警署」、「俾著我聽到借錢即時失聰乜都聽唔到！一定叫佢報警求助！」。有數口精的網民補充「啲錢咁易賺」、「一個$600，十個就$6000，密食當三番囉！」、「一日搵夠兩三個，就有$2000袋入袋。遇到呢啲正路帶埋去差館搵警察叔叔幫佢手啊」。
有冷眼旁觀的網民則好奇「有結果通知聲」、「留言睇結果」、「留名睇後續」。由於樓主因為對方「好誠懇就信咗佢」，於是有人更笑言「個阿叔肯定好靚仔……」、「佢一定好靚仔……如果唔係你應該唔會中伏」、「你是否單身？是否對方好靚仔？你是否希望好像童話一樣千里姻緣一線牽？否則我想不明白有乜嘢理由會信？可能是我膚淺吧！」。
相關閱讀：當街拉址男途人搭訕 紅磡馬尾女又摸又掃 一散水舉動令人咋舌
借錢黨新招殺入屯門逐張睇↓↓↓↓
網民分析疑點教路應對：
•一見到即刻掉頭走啦，佢再講即刻話報警或者同佢去警署。
•唔好諗無真相嘅嘢，你出於好心幫人就已經收福，真係有心呃你嘅人亦會有惡報。
•應該伏咗了，當破財擋災啦，你出於好心係善良，但以後要小心，騙子多的是，一句趕時間走人，別和對方交流。
•和尚都可以假，何況是普通人？別太好心腸！若有人話無$，無論係詳原因，香港人嘅就叫佢搵社工，外國人嘅就叫佢搵警察。
•你依家唯有諗：佢係大陸富二代或者富三代，聽日兌現承諾。再俾驚喜你，等你聽日一朝暴富。咁樣諗你今晚應該瞓得著，人要正能量嘛。
•你當買咗$600六合彩做咗件善事就算啦，當自己幫咗人唔好當自己俾人呃，咁會開心啲，預咗無先，如果聽日真係還到俾你，咁更加應該去買注六合彩了。
•伏氣好大，但如果你嗰刻信人就先預咗自己可能會俾人呃，但既然做咗，咪當一個教訓，或者人哋聽日真係俾番錢你呢，我上次都幫咗個人，但金額好細遮，雖然真係無回頭，但做咗覺得自己好似做咗好事咁就ok啦，人總有好人壞人，未必過過壞嘅，人哋問你過到自己就ok啦。
•好多疑點呀！一個人冇錢又點可以來到香港又深入屯門呢種居民區？佢一個朋友都冇？中國人冇銀聯又冇電子支付，外國人又冇信用卡（係真都俾入境處卡在係機場）？所以下次要就幫佢帶路去差館，保證吃喝不愁，仲有翻譯，分分鐘仲有免費機票返回原國，好過你幫佢個$600之後佢仲要煩點樣還俾你。
相關閱讀：「伸手黨」中央圖書館外搵食 3女邀「坐車去XX」 DSE考生出殺手鐧了斷
網民自爆遇懷疑騙徒經歷：
•10幾年前我已遇過呢類拆白黨，當時我話帶佢去搵警察，佢就閃開咗。
•當年新發邨未拆，已經有人響河邊咁樣問我，我著住校服，梗係冇錢俾佢啦，估唔到而家仲有。
•上個月夜晚喺石排德雅工業中心樓下，有個西裝普通話排骨地中海同個女人，佢夠話上海嚟傾生意，又話個支付寶用唔到，叫我俾錢佢食飯，我一句得埋去「唔識聽你講乜」就走咗。
•今日都有一對大陸口音男女係新墟屯門診所對出用同一招對我，叫我俾錢或支付寶佢食飯，我即時同佢講，你喺對面馬路賣咗部電話咪有錢囉！即時唔出聲走咗去。
另有網民精明地想出計中計，估計「聽日真係還$600俾你，要多謝你請你食飯讚你好好人，但佢外國有單貨未找數叫你再借8萬！」、「放心啦！見妳咁好人，可能會還俾妳，佢話係「生意人」大家交個朋友，遲啲再借6萬、60萬……」。
相關閱讀：港女皇崗口岸疑遇迷暈黨 三度碰面企到好埋 一除口罩由頭暈到尾↓↓↓↓
有港女早前在皇崗口岸疑遇迷暈黨，她三度碰到一名男子「企到好埋」，向她借WIFI，不斷向她問問題，女事主覺不對勁「調頭走」，上到車一除口罩，即「由頭暈到尾，差啲倒地」。女事主表示：「如果我唔係戴咗口罩，同有啲警覺調頭走，應該畀人攬咗上車。」以下為事發詳情：