【曾智華專欄】導技演技大示範

電影與其他商品的最大分別，為經典大製作與垃圾製作，收同樣票價，毫無道理可言。另外，優質電影可能又被院商放到山旮旯影院放，一般觀眾想睇都難。幸而我呢類退休長者時間多，可以唔怕煩，專誠去睇。

最近撞上一部電影，也是導技及演技示範級精選佳作，全套戲只在一個的士車廂內發生，兩個人對話做足100分鐘，正是《解憂計情車》。

你話嘞，若導演功力差少少，男女主角演技唔夠班，點搞？肯定5分鐘已全院搵周公。

不過，此片幕後藝高人膽大，男主角為奧斯卡影帝辛潘，64歲，唔輕易接拍電影，若非有挑戰性劇本，不拍。今次老辛睇完劇本，即接。事實，佢由頭帶到尾，過足癮，兼角色似度身訂造——一個飽經風霜，滄桑又善良的士大叔，就在一程車中，將獨處的女乘客人生際遇，似剝洋葱般逐一揭露。雖然粗口橫飛，但扮演紐約的士佬，也非常貼近現實。

女主角狄高達莊遜，父親是大明星當莊遜，母親同樣是著名演員美蘭尼姬菲芙。來自演藝世家，當然滿身戲劇細胞，加上靚女，真真睇足100分鐘都唔厭。

此片能拍成，當然先由導演兼編劇姬絲賀「誕下」劇本。演出的難度咁高，點搞？幸而狄高達一讀劇本，即愛上，並飛奔往住隔兩條街的辛潘，求佢演出。人與人的化學作用，好難用科學解釋，奄尖到震的辛潘，睇完劇本，即殺！

此乃導演姬絲賀處女作，但絕無覺得絲毫生手，反之，引導兩位主角一步步進入劇情高潮，直至⋯⋯（大家去睇啦！）

電影末段，搞到全院觀眾唔想「落車」，認真犀利。具深度的精彩電影，瞓身支持！