【曾智華專欄】未結婚先預會離婚

世界變，人的價值觀也隨之而變，冇話啱唔啱，總之世情就是如此發展。
　　
最簡單是結婚。兩個人為乜要結婚？乃因情投意合，才步入教堂或婚姻登記處，在見證人（神父、牧師或律師）跟前，大大聲讀出承諾，表明無論貧窮富貴、健康患病，都會照顧對方一生一世。喂，你係咪當講玩？
　　
事實越來越多人「誓願當食生菜」，各個大城市一樣，結完婚之後，離婚數字有升冇降。
　　
另外，以前結婚，其中一個原因為組織家庭，傳宗接代，令一切可以延續，生生不息。
　　
因為若冇新人口補充，一個城市、一個國家皆會陰乾，慢慢走向衰亡。若單靠外來人口填氹，則整整吓會變形走樣，不再是原有文化的城市了（香港會否變成咁？）。
　　
最新潮流，興唔結婚，興離婚，興唔生BB，全部是違反先天基本設計，再下去會點，真係你問我，我問邊個？
　　
另一我輩唔多習慣的「現代人行為」，乃是——未結婚先預會離婚！吓，咁即未結婚已對呢段婚姻冇信心，預咗會散檔，故補定鑊。
　　
其實若心態如此，結嚟把鬼乎？
　　
香港現今新人傾向點，我唔知，但我知洋人早早流行未婚就簽定「協議書」，內裏聲明一旦散檔，點搞。
　　
上周本報A1頭版，正是介紹逝世女星李玟與丈夫Bruce婚前簽下的協議書。
　　
真真大開眼界，原來咁都得！內文聲明一旦反面，婚姻破裂，點搞？都咪話唔揦脷。原來若一年內關係破裂，Bruce要賠近億港元畀CoCo。另又提及不同年份「掟煲」的話，生活費要由每年一千萬元至二千多萬元不等。
　　
睇睇佢倆2011年結婚時，咦喂，Bruce只有二十萬元月薪，竟然夠膽簽咁勁的協議書？好似唔多合邏輯噃！

加拿大星島WhatsApp報料熱線：(437)428-9394

下載「星島新聞(加拿大版)」App，隨時看到最新最快新聞：
iPhone：https://apple.co/2IBi812
Android：https://bit.ly/2Pe8anu

訂閱加拿大星島網電郵快訊，每天可收到最快新聞資訊電郵： https://www.singtao.ca/subscribe/singtao.php

>>>訂閱CCUE YouTube 頻道，查看更多吃喝玩樂、生活資訊影片。