【曾智華專欄】貪「蛤乸」者必中招

有幾個自稱叻仔的朋友，最喜歡與騙徒「玩」，因佢哋認為騙徒成功騙人前，必定先大放甜頭派福利，因只有如此，才能引到大量水魚上釣。
　　
例如龐氏騙局，第一、第二、第三群入局者，都會賺到盤滿缽滿，深信真係「好易中好易買餐餸」，才會將經驗四出宣揚，游說親朋戚友快啲參加「發達遊戲」。
　　
叻仔們認為，只要賺頭一、二、三輪就退出，咁就變長賺，留返班水魚去送死。
　　
係唔係呢？難講，但起碼小弟從未見過這種叻仔「住上半山區」，做咗管理高層，甚或豐衣足食，多只是繼續吹噓自己可以征服騙徒。
　　
香港騙徒之多，如天上繁星。不少手法真係老到牙都甩，仍大把水魚上當，乃因兩個永恆的原因：貪婪、無知。
　　
最近通關後，又出現大量免費旅行團。有啲𠱁你去星馬泰菲等地參觀Time Sharing別墅或酒店，聲稱放下一筆訂金，就每年可「免費度假」。
　　
另外，唉⋯⋯內地樓市跌到一仆一碌，咁點呢？當然要打鑼搵「香港水魚」上去幫手掃貨啦。
　　
騙徒深知道不少港人對買樓有高度興趣，甚至心急如焚。剛剛遇上內地大量爛尾、空置、斷供⋯⋯甚至「鬼域樓」，急需人接貨。
　　
咁點搞？最緊要你貪！
　　
故此，近日不少免費包食包住包車睇樓團，頻頻拉客。總之，唔怕你精，唔怕你呆，最怕你（唔貪心）唔來。
　　
反正內地各式冧檔單位（商業、工業、住宅⋯⋯）多如天上繁星，幾十萬元到幾百萬元任你執（當然執條襪帶累身家啦），只要你肯入「籠」（困在售樓處），班訓練有素的經紀，自然會搞到你走唔甩，最少五個有一個中招（買咗間唔知乜物業）。
　　
我都好想介紹幾個叻仔朋友去「大顯身手」。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。