【曾智華專欄】同一條鞭，時軟時硬

嗱嗱嗱，各位咪心邪啊！今日的標題，乃正正經經講鞭！乜鞭？是握在冠軍騎師潘頓手中的馬鞭。究竟佢幾時「硬」、幾時「軟」？真係得佢自己知，所有捧場馬迷，絕對吹佢唔脹。

大家都畀佢玩到陀陀擰！上周日跑十場，佢坐騎竟然有八隻大熱！

究竟是否全港馬迷、馬評人及「外邊投注者」皆懵到上心口，亂咁買呢？結果八隻之中，只得兩隻一點四倍的「永遠美麗」及「金鑽貴人」勝出，派彩加埋唔夠買半粒驚風散。

小弟一再強調，如今香港跑馬，真係任阿「軟硬鞭」（我替佢起的新綽號）開。真跑又得，夢遊又得，狂揪又得，輕掃又得，犀飛利。大家可以賽後重溫佢「軟」同「硬」有乜唔同。簡單，你留意佢落第的幾隻大熱演繹方法，相比入Q的「驕陽明駒」，就可以扎醒，歎句：「嘩！原來可以咁大分別嘅⋯⋯服晒！」

論騎師，艾道拿似乎開始慢慢適應香港模式，由走位到鬥最後一百米，比起初抵埗時，有明顯進步，可繼續留意。

上周日賽事，睇住《賽馬日在線》，其中一幕好搞笑。因「零零亨」見到「堅又威」有幾十人扶老攜幼落沙圈，提示大家捧多少場。其實呢匹馬乃母校聖若瑟書院大群舊生的「堅又威賽馬團體」（Green and White）夾分引入的。每次出賽，個個似參加嘉年華，全部成員家家空群而出，當然，更人人有理冇理真金白銀狂掟，結果次次賠率與勝出機會不成比例，變捐款。

今晚要留意方仔兩隻。第一隻「黑桃火箭」，報名時寫何澤堯，真上陣是布文，上鋪陳嘉熙只能入Q，今次不可再誤於庸手矣。第二隻為「獨角獸」。上次戴文高剷入第三，今次即換田泰安，三檔，夠鐘收割！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。