【曾智華專欄】老男人佳音

從來冇諗過，男人去到咁老仲可以咁勁！

記得童年時望著父親及一眾叔伯，覺得男人40幾已紛紛露出老態，歲月無情，殘晒。故此，55歲退休合理，60左右已紛紛拜拜去也。

但發展到今天？唔係嘛，乜個個食咗仙丹乎？最大「笑料」當然為腳震震懵閉閉成日PK的拜登，竟80高齡做美國總統，更雄心勃勃爭取連任！

而佢對手特朗普都唔細，70有6，仍日日想捲土重來，權力欲及權力火，半點也沒減退。

更神奇，原來老男人的性能力可以好勁！勁到匪夷所思！說來，近十年小弟身邊同齡之輩，已紛紛前列腺發大，又或性欲日漸「力不從心」，諗住個個都係咁上下啩？

原來唔係！你睇鋼琴家劉詩昆，83歲得女，問你服未呢吓？

荷里活的老男人產子更熱鬧，先有79歲金象影帝羅拔迪尼路宣布再為人父。跟住一個更勁，83歲的阿爾柏仙奴，也一擊（唔知係咪㗎）即中，做得佢個孫咁年紀（29歲）嘅女友Noor Alfallah宣布懷孕。

最過癮，荷里活巨星的女友及老婆，好似「踢波」咁，一時你交畀我，一時我大腳全中畀你。

例如呢位Noor妹妹，咁細年紀，已經可以短期同幾個名人有一手，當中包括90幾歲的巨星奇連伊士活及70幾歲的米積加。你話啦，以我哋少少保守的華人睇，係咪有多少O嘴呢？

最近香港有位移民的大教授，雖則80幾歲，但早年喪妻，獨身一段日子後，如今身邊又有咗紅顏知己喇。

大教授散布全球的弟子，不少已70多歲，見到老師咁有艷福，笑不攏嘴問：「咦，佢會否又變『阿爾柏仙奴』呢？哈哈哈！」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。