【曾智華專欄】馬會派錢

網上論馬節目N咁多，各有特色，小弟比較喜歡睇「馬評元老」張福元論述。

張兄寫馬評馬幾十年，風格不變，堅持的也不變（認為啱的一套，會信奉幾十年）。

佢寫馬無大娛樂性，但出鏡就不同。老張充滿英國紳士風格，從不動氣大罵或情緒激動，永遠冷冷（靜）的，兼且經常用幽默感指出一些坊間謬誤，講時皮笑肉不笑，過癮。

上周又睇佢拆解遮打盃一級賽，知識性及娛樂性滿滿，非常可觀。

佢眯眯嘴同拍檔講：「呢場馬會派錢啦，邊有得跑呀？只得兩隻跑，位置Q贏硬，派11蚊馬會都蝕！仲有，『將王』分分鐘贏『浪漫勇士』，因後者根本未跑過2400米。相反，『將王』曾在卡塔爾及香港贏過國際一級賽！」

早前不少「業餘」分析認為「將王」5月初跑2400米，明顯輸畀「直線力山」兩個幾馬位，應是去完外地作賽後隻馬Down咗。

呢點張福元又有佢獨到透視式看法：「上場根本不是目標，遮打盃先係！上次跑讓磅，今次跑平磅，一來一回，『將王』賺返十幾磅，『直線力山』邊有得跑呀？呢場一定單Q！」

我聽完之後信服，於是跟足先買單Q，再買複式二重彩，「浪漫勇士」搭「將王」，然後重錘位置Q，睇睇馬會可唔可以跟足張福元神仙棒——派錢？

結果，開！冇得唔服，果然「將王」呢場脫胎換骨，回復真身，終點前殺低「浪漫勇士」。

擺明單Q，但連贏派近40蚊，二重彩派139蚊，「冇得輸」的位置Q，並非如老張估計派11蚊 ，而係接近20蚊！

上周日全捧戴文高WP，七隻只有一P，瘀晒！

今晚佢「夫卜」，練馬師們大欣賞。好，再WP多一次：「包裝大獎」、「盛世名駒」、「至尊高飛」、「高高」及「無敵精英」。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。