古天后日誌｜港股暫難擺脫易跌難升困局

5月30日，大致天晴，日間天氣酷熱。英美股市隔晚休市，歐洲股市高開低走，美匯指數反彈至104.5，短線留意105心理關口。美元持續走強，大宗商品及虛擬貨幣均見回落，美國兩黨就債務上限已達成協議，債務違約風險大減，債市空軍離場，10年債息回落至3.76%。不過通脹數據未見再回落，更有些軟回升壓力，6月加息機率已升至60%，市場更多人認為最快要到第四季先會開始減息，並在年底前將聯邦利率調整至5%。

以目前經濟增長速度睇，美企盈利表現只係一般，但美股卻強勢依然，其中納指更於Q2反彈三成，目前納指平均市盈率達到30倍，唔少科技估值未免有啲過高，吸引力已減弱。至於內地經過1月及3月份放水後，借貸未見有太大起息，工業生產偏低，而通脹問題仍然嚴重。香港呢邊復甦亦不似預期，經濟數據仍見收縮，呢個係中港股市一直被睇淡，再無資金肯進入嘅原因。

雖然4月及5月初，A股日均成交達到1.2萬億，一眾中特股更落鑊狂炒，只可惜高位無以為繼，A股成交至5月中已開始縮水至8000億元，上周更見外資持續減持，5月整體流入金額只有250億元，係近三個月最少嘅外資流入月份。

過去半年中港股市明顯係中外資鬥快，ATMJ等重磅科技股，一直見外資股東減持沽貨，對沖基金更入場做淡，即使中資力托中特股，但外資未有參與，港股自2月開始出現一浪低於一浪嘅狀況。由於5月份被炒高嘅中特股已乏力再向上，阿爺再搬出任何概念，都再無資金入場參與，而外資進一步大力沽售重磅科網股，恒指失守20000水平後，進一步失守19000水平，睇嚟今日期指結算，能守住18500-18700點已算萬幸。
值得留意呢兩日成交開始由900億左右，回升至1100億元，似乎開始有資金入場撈底，只可惜咁嘅成交額都係無乜睇頭，除非成交額能回復至1300-1500億元，否則港股仍難走出困局，繼續陰乾易跌難升。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。