【曾智華專欄】食藥Vs.唔食藥

年紀大， 機器壞。我輩同齡男人行埋時，多會互相交流大家有幾多種病、食幾多種藥。
　　
最為普遍，當然為血壓藥及膽固醇藥，兩者愈來愈優質，也不覺有乜明顯不良副作用。
　　
就如小弟，一九九五年開始服用，轉眼已近三十年，簡直已當正常「餐」的一部分。
　　
出事一次為二○一五年，誤以為經已退休，壓力大減，故自動減血壓藥。結果，三個月內出事，血壓未能控制在正常水平，終於搞到眼中風，醫餐懵。右眼至今仍未完全康復，幸而冇惡化，已感謝主！
　　
食藥，不同人有不同心態及感受。
　　
昨日與舊同事晚宴（食多一次得一次，因個別唔係移咗民去外國，就係移咗民上天堂），話題又係食藥。過癮，出現南轅北轍的決定。
　　
「高佬W」夠鐘出現前列腺問題，小便唔暢順，點搞？醫生開特效藥。W哥一食，副作用嚇人，不時血壓過低、冇食欲、手軟腳軟、神志大受影響，駕駛時雖可勉強集中，但一回到家就泊位即撞牆，立即通知醫生。
　　
「W先生，咁啦，試第二隻藥！」醫生冷冷咁回應，慣性反應，似乎冇乜緊要。
　　
好，又試第二隻。大件事，上述情況更甚，W哥成個人變成冇晒心機。
　　
點搞？大丈夫自己決定——放棄食藥！
　　
結果唔食藥立時「打回原形」！即胃口好咗，人精神返，血壓正常，體力恢復。唯一是回復小便冇咁暢順，間中「滴滴仔」，但平衡利害，唔食（藥）好過食！
　　
另一老友「氣勢S」則相反。糖尿病，醫生要佢戒口戒酒，否則好難好返。S哥人生最大樂趣為大吃大喝交際Social，你叫佢戒？即同醫生講：「我絕不戒口！有冇其他方法控制糖尿病？」
　　
「食雙倍藥囉！」醫生回應。結果？雙倍就雙倍！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。