【曾智華專欄】一貫超值，一貫早走

不經不覺，《狂野時速》系列由2001年開始，已拍咗二十二年，最新上畫的，已經來到第十集。
　　
小弟長年捧此片場，十集全部睇足，次次一上畫即飛身買票入場，從不間斷。
　　
不過，由第三集開始，已有個慣性，次次睇，次次覺得大大超值，不過，次次未睇完已中途離場。點解？三個字——夠晒皮！
　　
《狂野時速》賣乜？係人都知：美女、大隻佬、靚車、飛車、槍戰、驚險、奢華及特技。其他呢？演技，冇乜；劇本，一般；藝術成分，絕少；信息，近零⋯⋯純粹百分百商業片。
　　
既然套套如此，我入場的心情就似開大食會。食品琳琅滿目，耀眼美味，一坐低已擺到通枱都係，另加N種美酒。如此格局，點會輕談淺酌吖，當然係人人放盡豪情，大吃大喝。
　　
不過，半小時後開始有飽的感覺，再過半小時簡直頂到上喉嚨，望見任何美食已再無法開胃，磨落去也冇意思，當然想起身走人啦。
　　
埋單？一百元！抵到無話可說。故此，每隔兩年凡有此抵食盛宴，我一定再仆去入場！
　　
一邊睇《狂野時速10》，一邊想問個製作者：「喂，老友，呢類片，使乜鬼拍到成兩個半小時咁長呀？嘥料啦。其實個半小時已應該收工，根本絕無需要猛拖，見好即收嘛！」
　　
其實呢套《狂野》的最精采場面，我早一個月已從預告片中睇過多次，故再無興奮感。
　　
不過，仍然要讚句：「抵到無話可說。尤其飛車場面，勁度難以想像，簡直荷里活AAA級，大大超班。」
　　
此外，幾年冇旅遊者，也必會空前滿足，因眼睛可以環遊世界——美國、巴西、羅馬、倫敦、葡萄牙、南極…… 車車咁轉。
　　
小弟睇的是首映日早場，長者飛，五十元。問心，論價值，畀五百元也不為過！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。