【曾智華專欄】高薪養廉低薪養乜

今日標題，我絕非鼓勵或指低薪者應該犯法。只想指出，從心理學、犯罪學及經濟學去分析，低薪者又低到唔合理的，最易受到引誘而犯法。
　　
半世紀前的香港，成立廉政公署，大力掃貪，以下三招齊發，雷勵風行，火速見效：高薪養廉、教育滲透、嚴刑峻法。
　　
高薪，令公職人員犯罪成本大大增加，絕對博唔過也；教育，必須由幼稚園開始灌輸廉潔觀念，配以ICAC社區關係處深入全港各區、各校、各組織，大力宣傳肅貪倡廉；嚴刑，加強立法及加重判刑，給社會一個絕不容忍貪污的信息。
　　
周三本報A1頭條相當震撼——《香港足球壇恥辱．愉園涉集體打假波》。
　　
其實球圈一如馬圈，有錢就有蠱惑，一旦加入賭博，必然會湧出大量蛇蟲鼠蟻，意圖製造/操控賽果，以謀取黑金。香港足球，馬會冇開賭，但外圍有，這並不是甚麼秘密。
　　
昨晚與球圈人士晚飯，當然呻到樹葉都落：「碌Sir，鬼咩，香港球員地底泥咁低人工，個個窮到燶，一遇引誘，唉⋯⋯ 人性貪念怎不打倒理性？」
　　
呢單案好明顯有自己人睇唔過眼舉報，故才可以爆出咁多內情，包括用乜嘢古靈精怪訊號傳遞訊息，連球場內出現的外圍佬係邊個、邊個有分參與，全部落齊，應該將會一鑊熟嘞。但大家仍想睇睇，廉記如何順藤摸瓜，再大力連幕後組織者都抽出！
　　
其實過去一年中國也在嚴厲打假波，連國家隊前總教練李鐵及南韓國腳孫準浩都高調拘捕。大家聞唔聞到，香港今次也頗有配合中央味道呢？單單拉人，必定不能消滅假波，且看特區政府又會否在其他方面加以配合了。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。