【曾智華專欄】超級擾民過關程序

港珠澳大橋建成後，一直拍烏蠅，惡評如潮。每次我坐船到珠海，見到呢條天文數字建成的「冇車用」宏偉建設，都感到極可惜，極想深入了解為乜「搞成咁」。
　　
趁大假過後，約二十位退休老友，組團到順德尋找美食，刻意來回取道港珠澳大橋。
　　
人人試過一次後，應了解為乜佢拍晒烏蠅，咁靚都冇人用，終於去澳門珠海寧願搭船，去內地其他城市寧願搭高鐵。
　　
其中（話明其中，因可能另有我未理解的）一個主要原因，乃是過關設計煩到抽筋，超級擾民，程序有一半根本絕無需要。
　　
用港珠澳大橋過關，要先在香港口岸前落車，拖著行李冒著寒風（冬天），身水身汗（夏天），徒步先過香港一關。行呀行，小弟親眼見到不少長者，為慳錢參加平價團，也經此關。但睇見大群老人家，或扭吓扭吓腳軟軟，或要用枴杖緩慢行，或根本要坐輪椅，拖著行李，先經第一關捱幾百米，再上上落落大旅巴。
　　
然後過大橋，去到珠海，又再重複上述程序，都唔知為乜？簡直就似「玩」班老弱過關。客觀睇——毫無需要！
　　
負責的大官，請企出嚟解釋，呢個超級擾民過關程序，為乜唔精簡到變「一地兩檢」？有乜做唔到？使唔使民間智慧教你點做？
　　
之前就話好多「反對派」阻頭阻勢啫，如今「良政善治」，一切政府政策點會過唔到？你睇睇高鐵過關幾方便？仲有邊個會反對「一地兩檢」咁戇居？
　　
若冇，唔該快快落實，等呢條「大白象橋」可以發揮基本作用！
　　
內地四處皆見宣揚營造人民的「幸福感」。但當我見到老弱傷殘身水身汗過關時，即想問兩地入境處大官：「這裏何來幸福感？」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。