【曾智華專欄】遠離「情緒炸彈」

一班朋友晚飯，當然八吓呢樣、八吓嗰樣，上周最熱辣八卦新聞，肯定為「金剛前女友漏片」事件。幸而當事人心理質素極之強，加上一貫作風屬豪邁奔放，故火速公開承認，相信問題很快Die Down。相比之下，金剛略欠風度，不但不安慰前女友，反之公開的反應及發言，對自己曾經愛過的人，實在有點唔得體。

其實男女間之事，正如家家有本難唸的經，冇得話邊個對、邊個錯。飯局話題傾傾吓，傾到早前幾乎死人的一宗交通意外。

案發清晨時分，一對年輕情侶在尖沙嘴坐的士往荃灣，期間發生爭執，當車在青荃公路飛馳之際，男方突然情緒失控，開啟車門就跳出去。

幸而司機機警，立即收慢車速，但血案已成，男子滾出路面穿頭淌血，女的即下車安慰，一切發生在快速公路中，真真險象環生。的士大哥唔話得，不但冇抱怨，更落車冒險指揮交通，以免一對情侶被撞。

大家討論此案時，一致結論：「女方必須盡快找機會擺脫這男友，否則，就如天天有個失控炸彈放身邊！」

講到呢處，過來人大L發言：「唉……我正正有同樣經驗。三十多年前與一位靚女拍拖，初頭唔知佢有躁狂症，但就在愈拍愈親密時，佢情緒失控天性開始頻頻出現，經常無理取鬧大吵大鬧。有次送佢回家時，就在隧道口發晒脾氣，要立即落車，否則跳！以為講吓啫，點知在時速七十幾公里時，佢竟大力拉手掣，搞到架車狂打白鴿轉！幸前後冇車，否則必定炒大鑊！」

結果？難道黐住個情緒炸彈一世？當機立斷，部署幾個月才終甩難，但「接手」位幸運兒慘到點，無謂講嘞。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。