【曾智華專欄】拒絕一億．後台腳震

江湖規矩——冇免費宣傳，唔該交功課！
　　
講緊乜？正是有「Fit馬」之稱、精力經常過剩（日日馬不停蹄四圍飛，仍走去身水身汗拍電視）的馬時亨，部署大半年的節目《馬時亨．香港情》，終於面世，明晚九時四十五分在翡翠台首播。集集不同嘉賓，碌爆老友卡才完成，當然非常緊張，望開波就有好收視率。
　　
故此，與製作人蕭潮順度啊度，決定以「歌神」張學友做頭炮，希望一雷天下響。
　　
咁當然要宣傳度橋。除TVB不停出Promo外，更誇張，大家如今若日日搭港鐵，都會見到Fit馬擺出個英明神武款，晒出系列嘉賓名。
　　
喂喂，邊個咁重錘落港鐵廣告？幕後人勁多「橋」，當然晨早部署。首先搵得港鐵集團落水贊助，承諾集集包有港鐵建設介紹，交換宣傳，各取所需（不要忘記，馬時亨是上任港鐵主席，由佢Sell港鐵，最Fit）！
　　
好啦，講返文首第一句——唔該交功課。
　　
節目推出前，Fit馬約齊所有傳媒老友，希望預先力谷。小弟有分參與飯局，當然問：「馬主席，單刀直入，唔該畀兩個吸引重點！」
　　
一撳掣，佢立即交功課：「有有！第一集我同張文新一齊逼張學友，結果爆出兩個從來冇人知的秘密！第一個，佢曾拒絕一項唔使唱歌的一億人仔Offer！點解？睇節目啦！基於咁，終益晒另一個巨星，收五千萬人仔即殺！點解佢會嫌錢腥？正正顯示張學友的個人質素！」
　　
咦，呢個宣傳點果然有料到噃！
　　
「另外講多個吸引點。張學友在節目內，爆出一位公認『舞台王者』巨星，原來出台前，驚到腳震！係咪難以想像呢？學友點知？正因一齊排住等出場也！」
　　
《馬時亨．香港情》，我預先睇晒第一集，真係得，一於推薦。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。