【曾智華專欄】加州夢Vs.加州白果

放長假，走咗N咁多人，好鬼寧靜，呢種感覺，在香港乃相當高享受。
　　
小弟絕不會呢段日子外遊，因機場逼爆、機票食宿乜都貴外，更會失去慢慢歎「寧靜香港」的黃金機會。
　　
留港Hea幾日，睇吓串流平台，買啲好魚靚肉返屋企慢慢撚，然後，再度吓馬仔，真疏乎。
　　
明日沙田兩場二級賽，短途錦標當然睇「金鑽貴人」單騎表演「執錢大法」。馬主鄭氏家族，羨慕死班跑極冇得贏的馬主，同是付出七萬、八萬元一個月養馬，一個天堂，一個地堂。
　　
另一場主席錦標則必好睇。成個局，乃「蔡氏宗親會」血戰告東尼，因蔡氏四隻上陣，蔡約翰出「夏威夷」及「健康快駒」，羅富全出「發財先鋒」及「健康愉快」。當中「健康快駒」及「發財先鋒」評分未盡，絕對有力與告仔戰馬一撼。
　　
告東尼出明星馬「加州星球」，睇賽績當然冇得頂，三季出戰十六次，九W六Q一第三。不過，有兩大疑點，此馬剛剛兩場只能入位置兼評磅員一分不加，即係點？即係似乎已到頂峰，盡盡哋嘞。加上上場要力鬥「金鑽貴人」，用咗唔少力。鬥輸，打擊英雄感及耗去不少體能。故此若呢場成頂頭大熱，可以慳返，反正只是二級賽，不如保留里程稍後再博。
　　
若如是，應畀廄侶、今季仍未W出的「美麗同享」去馬。上次潘頓騎，輸畀佢老友賀賢的「北極光」，有少少「唔多似真」。
　　
綜合分析，呢場應買四隻「健康快駒」、「發財先鋒」、「美麗同享」及「加州星球」二重彩複式。總之唔要「加州星球」W，慳返可也。
　　
明日告仔出幾隻「加州」，好似想大唱《California Dreaming》。加州夢，乃我輩年輕一代日日都發住的。不過，夢醒後，返回現實，分分鐘會變「加州白果」。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。