【曾智華專欄】「零零亨」專攻女人料

星島集團旗下的《賽馬日在線》，愈做愈上力，好似一匹靚馬咁，跑吓勁啲，跑吓又勁啲。
　　
由少少業餘又冇廣告開始，到今天各主持人有晒默契，明顯粉絲日比日多，自然廣告開始一個又一個出現。記得開波時，小弟口多多忠告黃以文老總，千萬咪接壯陽藥、避孕套及桑拿揼骨指壓廣告，因會令自己形象側埋一邊（心照啦），好難吸引高質素擁躉。
　　
幸而各主持形象唔錯，尤其女主持，冇乜「煙精」聲或用詞粗鄙爛撻撻，全部斯斯文文，於是節目檔次慢慢提高，廣告質素也提高！
　　
記得兩年前，我又試過亂噏當秘笈，提議搞個馬場密探，專報八卦花絮，尤其沙圈「不尋常」動態。
　　
哈，又得咗！結果跑出個「零零亨」，現場𥄫實有冇練馬師父母、老婆及女兒入場。
　　
男人心照，大家皆有英雄感、皆愛威，有女人（老婆、女兒）在場，雄性激素特別勁，若冇信心，點會叫自己女人亮相？
　　
呢呢，上周日「零零亨」正正𥄫到難得一見的苗德禮女兒Dominique著到靚靚出現，嘩，呢個今季霉到飛起的練馬師，應該有計喇！果然，「是必飛飛」接近八倍W出！
　　
今晚快活谷跑九場，出奇地潘頓只接六隻Booking，不過，千祈咪以為佢冇機會做騎師王，因隻隻皆可能W出。
　　
熟知潘頓「騎性」者，必知此君的忽龍忽蟲跑法，遇上弱勢練馬師，分分鐘交行貨。
　　
但有三個馬房，潘頓則必出真功夫，正是黎昭昇、蔡約翰及告東尼。尤其今季的黎廄，恍似由潘頓做主帥。今晚大家可全捧此廄，因分分鐘有四隻W、P過關——「創福威」、「喜快」、「萬眾開心」及「勝神威」！潘頓唔接咁多坐騎，應是要集中精神及體能也。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。