【曾智華專欄】從化賽馬蹄聲漸近

無論點樣閃避，其實人人（馬圈內外）皆知，從化馬場的建立由Day One開始，就是為內地發展真正賽馬而鋪路，當然一切要視乎國情演變，但目標絕對不變。
　　
這趟絕不會似一九九三年廣州自己成立地區馬會（當年鄧小平鼓吹白貓黑貓論，於是人人乜都搞餐懵），興建「廣州賽馬場」咁符碌。
　　
須知內地搞「賭博」非常敏感，若未有中央祝福而地方政府自把自為亂闖，十之九九必定瓜直！
　　
「廣州賽馬場」正是如此，撞正大板，終於冚旗，成個靚靚馬場先而荒廢，後而變為雜亂的汽車城、食肆中心、酒店及家具店。
　　
從化馬場完全唔同，乃因二○一○年中國舉辦亞運會，當中包括馬術大賽。中國搞盛事，一切由中央出政策，講到馬，當然香港最擅長，於是被委以重任，在從化興建馬術比賽場地。以馬會高層的精明，當然會順勢將其搞到可以變身成一個正正式式的世界級平地競賽馬場。既然有中央祝福，當然全力「去馬」。
　　
馬術賽完後，有晒默契變為香港馬會的練馬中心。一切一切，正是要為內地開展賽馬事業而打好基礎。
　　
喂，講講吓，嚟真嘞！廣州市政府剛剛發表《廣州市建設國際消費中心城市發展規劃（二○二二至二○二五年）》，個名水蛇春咁長，就是落實從化的整個賽馬事業藍圖。今次非常認真，會以高端旅遊消費、馬術主題酒店、馬術公園作配合。各位，有埋日子喇，二○二六年四月，正式開跑！
　　
講返香港跑馬。周三小弟受馬神眷顧，貼三匹全W，小小靠撞。
　　
明天第四班一千米，熱門「時時好運」必搏！冷就要「團結精神」啦！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。