【曾智華專欄】唱一場，可收山

上世紀八十年代，紅磡體育館落成，巨星紛紛排隊開演唱會。非常犀飛利，一開就是幾十場，包括許冠傑、譚詠麟、徐小鳳、林子祥、梅艷芳及張國榮等極具號召力的巨星。
　　
最巴閉為1992年的《許冠傑光榮引退演唱會》，竟然開足四十一場，非常得人驚。
　　
當時我與一位極具前瞻視野的製作人大A閒談，提出一個疑問：「哈，阿Sam的體能，從何而來的呢？晚晚在台上高度緊張，必定大量透支腎上腺素，可能好長手尾喎，有冇需要咁唱法？簡直搵命博喎！」
　　
A哥笑笑口：「得嘅，點解佢哋係巨星，我哋唔係，正因可以能人所不能。不過咁，除非班巨星真真正正享受年復一年不停站舞台『賣唱』，否則，以現今科技發展，我倆退休前，應該出現『唱一場，可收山』的情況！」
　　
即係點？即係一個巨星，精心炮製一場「只此一次」的演出，當然幕後不惜工本，撚到個個樂迷認為唔睇會一世後悔的演唱會。
　　
點解做一場就得？因通過最新科技，可全球直播（講時仍未有）。到時家家戶戶的電視畫面可能大到飛起，也高清到纖毫畢現，加上音響超級，享受可能比現場更高。
　　
A君當年指，只要度掂點樣收費就掂。一戶唔使多，收一百元已掂。全球中國人一齊睇，一億戶就收一百億元，十億戶就收一千億元！
　　
當年可能仍是一個遙遠的夢，但今天？已百分百可行並將出現。邊個做？正正是紅磡場數紀錄保持者許冠傑！
　　
不過，並非為賺大錢，而只是作為一個率先突破的製作，日期是4月14日，名《許冠傑全地球大合唱》。
　　
今次網上直播通行證為二百八十元。主辦單位將送出一千條Link作慈善，大家有興趣，上網打「許冠傑」應已乜都知嘞。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。