【曾智華專欄】積極鼓勵「沽名釣譽」

近年搞咗不少慈善活動，發覺香港人大部分充滿善心，也樂於助人，問題是你如何觸發起佢哋行善動機。
　　
另外，也有不少內心有點矛盾，行善時怕被指「沽名釣譽」，故有所猶豫。
　　
昨晚與一個慈善基金負責人晚飯，商量有乜可以合作。佢開宗明義表示：「碌Sir，我哋並非一個沽名釣譽的慈善機構。」
　　
小弟數十年前任職香港電台開始，到退休之後，組織的各種形式慈善籌款活動，不下過百。故此，對香港弱勢社群無助一族，以及各大慈善團體，有長期聯繫及了解。
　　
發覺善長大致上分三類：一、完全唔想畀人知佢行善的；二、唔介意畀人知道佢行善，但不會刻意的；三、好想全世界知佢行善，愈高調愈好的。
　　
第三類，正是經常被揶揄「行善為求出名」、「沽名釣譽」一類人，指動機並非真正單純行善。
　　
我又點睇？正如鄧小平所講——唔理白貓黑貓，捉到老鼠就是好貓。
　　
同理，唔理博出名或無名氏，總之，幫到需要的人者，就是「好善長」！
　　
昔日在電台廣播中， 小弟已不停解說，一定要多點鼓勵人「沽名釣譽」，為博出名，為曝光，為上電視，為攞勳章⋯⋯而行善。因為呢班人若冇得威威， 可能唔會捐錢。假若佢哋唔捐，最終受害者是誰？正是急需援助，處身水深火熱的弱勢族群。
　　
簡單邏輯，愈多人爭相為「沽名釣譽」而行善，善款就愈多，受惠的老弱傷殘也愈多， 此乃一個良性互動， 請問有乜唔妥？
　　
所以，看行善，也不應思想太狹隘，必須以結果（更多不幸人受惠）為目標。
　　
至於喜歡隱姓埋名行善的，無論如何也會繼續，不必用任何表揚手段去鼓勵也。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。