【曾智華專欄】唔聲唔聲嚇你一驚

上周日早上，手機彈出短信，來自對馬匹非常有研究的資深馬主「勁F」：「碌Sir，今日鄭俊偉有機會做練馬師王，捧多少啦！」

即刻睇睇賠率，二十八倍。排在姚、呂、東、賀、希、偉、黎及葉八個馬房之後。喂，馬會的操盤手好精準㗎喎，若有機會，點會開個咁冷的賠率呀？

不過，風水佬呃你十年八年，「勁F」有冇料到，幾小時內即揭曉！是日鄭廄出五匹馬，左睇右睇都唔似囉。

開呀！先來第二場隻「劍聶風」，輸十四個馬位，跑尾二！第四場更大大鑊，隻「菲力大帝」跑到仆低，將騎師楊明綸先拋下再壓住，搞到楊仔頸椎受傷，幸而無生命危險。喂喂，黑成咁，仲有機會做練馬師王？
　　
事態發展下去，非常出人意表。鄭俊偉先贏第五場「滿歡笑」，獨贏賠率五倍，次熱門身分W，唔算奇。

但跟住奇事發生！下一場佢隻「年年友福」完全冇過關飛，兼且冷到標汗，四十一倍！意即連幕後人都冇買，才會冷成咁。

哈哈，難以置信情況就在此場發生，冷門騎師賀銘年，突然馬神上身咁款，一條直路如飛殺上，劏咗潘頓隻一點九倍全熱門「馬主雄風」，立時全場鴉雀無聲。

大結局係鄭俊偉再在第九場輕風送爽，W埋隻大熱「晴王」，至此，正式成為「練馬師王」，冇得唔服。

這個本屬尾四的馬房，終於龍穿鳳，唔使褲穿窿，畢業有望矣。

好嘞，今晚齊齊「食泥」，玩全泥賽。呢類賽事安排，一季甚少，故泥地馬當然要趁機起筷。

蔡約翰被姚本輝追到氣咳，「蔡氏宗親會」的羅富全要扮演「攔路虎」喇。佢兩隻有機W，分別為「順勢而飛」及「年少有威」。另一隻阿蔡的「明駿福星」也要睇，攜手頂住姚廄。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。