【曾智華專欄】由「英俊九」到「九爺爺」

「權力是男人的春藥」，這句說話，在歷史上印證了N次。請看看克林頓及奧巴馬，做總統是怎樣的英明神武或意氣風發。
　　
今天？尤其奧巴馬，僅僅六十一歲，經已成個乾晒，滿頭白髮，完全唔係路！
　　
喂，話晒都係前美國總統吖，點解唔執執佢？難道冇咗權力真係會謝成咁？
　　
睇睇現任總統拜登，雖然行動遲緩，少少震吓震吓，但佢大奧巴馬十九年，仍起碼可以日理萬機，冇畀人一個殘樣。
　　
再睇睇下周一將赴內地「祭祖」（點解加引號？當然此乃藉口而已）的馬英九，套用一位曾經拜倒佢的女性朋友R形容：「真真令人心碎，點解搞成咁？」
　　
本來R乃百分百馬英九粉絲，由佢上世紀九十年代初出道，任台灣法務部部長時，已開始迷，再經歷過出任台北市長、國民黨主席，R的熱情不但冇減，反之不斷高漲。
　　
終於馬英九在2008年出選台灣最高領導人大位，R更組織旅行團，沿途追蹤。剛巧我當年也到咗台北趁熱鬧，正正遇上馬英九到夜市拉票。嘩，犀飛利，簡直勁過天王巨星出巡，不少女粉絲不停尖叫，更飛撲埋去拉扯，欲擁抱之。
　　
小弟站在遠觀，也覺群情洶湧合理。因當年的「英俊馬」青靚白淨，溫文爾雅，充滿書卷氣，也有少少羞澀之款，怎不迷死人？
　　
不過⋯⋯一任，兩任之後，立即露出力有不逮之感。
　　
加上被政敵圍攻，手段無所不用其極（理所當然，This is politic，Stupid！），結果，佢就由光榮上場，灰頭土臉落場，也慢慢變為「路人甲」，粉絲不再，崇拜者遠離而去。
　　
最新面貌，只七十二歲，已經皺皮禿頭雙眼無神，氣場大失，咁款去內地，肯定畀人帶住遊花園！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。