【曾智華專欄】葉劉必再「成功爭取」

薑是老的辣，你班新丁議員，真係要學嘢！
　　
小弟講邊個？嘻嘻，當然是我的「偶像」葉劉淑儀啦。你睇，阿姐在政治上幾時出招，招數如何，睇準邊個，力度幾大，全部精於計算㗎。
　　
周一《星島日報》頭條，又畀葉劉順利順手拈來，搶盡所有曝光。因為佢度出精句，夠晒搶Fo，老總當然照用啦——《葉劉轟５巴大加價「官民共憤」》。
　　
五家巴士公司夾埋向政府施壓，捆綁一齊提出加價，加幅開天殺價，相信一定過唔到。但開到咁高，就算「落地還錢」，點都有多少揸拿！
　　
可能一眾巴士公司以為立法會「完善」後，會好相與，凡事「得過且過」，唔會猛力反對。
　　
點知剛剛估錯！立法會冇咗班民主派後，係呀，所有政治議題及政府施政主張，一定好Easy就通過，因「上有政策」，冇人敢「搞搞震」也。這方面，北京及特區政府相當放心。
　　
不過咁，做得議員，當然不能事事擺出「乖乖豬」款，一定要「為民請命」的。如此，瞓身鋤落去邊呢？當然是民生議題。
　　
呢方面，葉劉超晒班。因為：一、佢乃行政會議召集人，冇個官敢唔畀面；二、做過高官，完全知道政府運作、管理心態及痛點；三、多次成功民選，對市民渴求，絕對掌握。
　　
有齊以上三項，其他政客點同佢鬥？
　　
上次阿姐要求增加馬會足球博彩稅，小弟在此早早聲明，必定「成功爭取」，中到開巷。
　　
好嘞，今次又如何？一定又畀佢搞掂。因運輸局根本唔敢將巴士申請加價原封不動呈交行政會議（記住，葉劉為召集人）。咁點呀？Regina講到「官民共憤」咁大，你仲想去馬？冇啦，低低哋躀一鋪，收返個申請，再度過啦，鬼叫你唔識「政治」，出招前又冇摸底咩。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。