【曾智華專欄】高手設計「搶購現象」

全世界地產商，論賣樓策略最高招，當然以香港的最有創意、最成功！無他，香港地細人多樓價高，搞地產，利潤比天高，故此，超級大富豪，財富主要來自賣樓，然後賺到的巨利，再發展其他。

幾大發展商賣樓，有比併，亦有默契。比併乃正常競爭，各出奇謀；默契則是——喂！大家同坐一條船，千祈咪搞冧個市或爭爛市，一定要托住個「靚價」！

此外，齊齊砌到個市好似好旺咁，最好做到凡新盤開，就出現排隊人龍「搶購」。

要多人排隊，由心理戰開始，揚言首發單位非常抵買，唔買就笨，笨完後蘇州冇艇搭，因將會加價！

長實及新地推出合作發展的屯門青山公路新盤「飛揚」，正是最新最佳例子。橋王趙國雄，綽號「樓神」，當然創意無窮。最新口號為——深水炸彈價！平到你唔信！目標為炸開整個樓市的購買力。

方法為推出一大個「超筍單位」，實用面積266方呎，只賣306.9萬元，即每方呎價11,538元。嘩！係咪抵到非常得人驚呢？喂喂，新樓喎，竟平過舊樓兩成有多？

這條「橋」，立即引來地產版紛紛頭條報道，肯定又有大量地產代理及急欲上樓者去排隊。然後，翌日發展商即公布大量消費者搶購「飛揚」，收票N千張！於是成個旺勢就此造成，吸引其他準買家，也怕執輸行頭，加入「搶購」。

老趙又一次成功造勢，令新樓盤慳好多廣告費也能街知巷聞。

其實說穿了，第一，較平，只得一個單位咁大把，兼且景觀是最低層對住鄰座的外牆，即係「冇景」！第二，人人入票，其實就是只想搶呢間賣大包的單位。真章，還是要等正式開賣，回復正價時看市場的反應！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。