【曾智华专栏】危机扑火总裁应快道歉

上周四早上，小弟在茶记叹早餐，手机传来“肥佬K”讯息，哇哇，乜事，机场点解好似走难咁，逼到爆晒，人潮好汹涌噃。
　　
咁多人抢住出外旅行？又唔系周末，星期四咋㖞，点解搞成咁？
　　
“碌Sir，我都唔知乜事呀，如今急到似热锅蚂蚁，死火，可能赶不到飞机呀。大镬！”
　　
究竟乜事？几小时后终于新闻报道，原来机场电脑系统“冧档”！
　　
吓？堂堂一级国际机场，电脑系统话冧就冧，影响千计旅客延迟四小时？但发生时，好似粒声都唔出，又冇向市民公布，又冇解释⋯⋯处理手法，难怪传媒公论——喂，唔多似香港噃。
　　
我哋正在大力推“Hello Hong Kong”及“Hong Kong Is Back”，点解好似未Ready咁嘅？
　　
最奇，咁大单嘢，周四全日都唔见机管局行政总裁林天福行出来解画。其实就算未能查找到其原因，都应第一时间鞠躬道歉呀，呢啲只是基本公关礼貌及扑火ABC啫，点解唔做？难明！公关部阿头冇畀建议大老板？
　　
再睇睇香港国际机场过去几年成绩，原来真系好鬼皱眉，竟然在国际航空运输研究机构（相当权威）嘅Skytrax世界机场大奖排行榜中，不断下跌，跌呀跌，跌到第三十三位（曾几何时，我哋好Top㗎），竟然连早年的“乡里机场”深圳宝安机场及广州白云机场皆扒咗香港头，真真情何以堪呢⋯⋯唉吔吔⋯⋯
　　
逝去了的都已逝去，唯有痛定思痛，望上周四呢单“爆镬冇通知”事件，成为管理缺陷上的最底线，切勿再跌，然后积极改善，再作反弹啦。
　　
一切部署，苏泽光主席与林天福总裁，百分之一百责无旁贷，请尽快定下改善蓝图，先公布，后落实。然后由三十三位爬返上顶！

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。