【曾智華專欄】危機撲火總裁應快道歉

上周四早上，小弟在茶記歎早餐，手機傳來「肥佬K」訊息，哇哇，乜事，機場點解好似走難咁，逼到爆晒，人潮好洶湧噃。
　　
咁多人搶住出外旅行？又唔係周末，星期四咋喎，點解搞成咁？
　　
「碌Sir，我都唔知乜事呀，如今急到似熱鍋螞蟻，死火，可能趕不到飛機呀。大鑊！」
　　
究竟乜事？幾小時後終於新聞報道，原來機場電腦系統「冧檔」！
　　
吓？堂堂一級國際機場，電腦系統話冧就冧，影響千計旅客延遲四小時？但發生時，好似粒聲都唔出，又冇向市民公布，又冇解釋⋯⋯處理手法，難怪傳媒公論——喂，唔多似香港噃。
　　
我哋正在大力推「Hello Hong Kong」及「Hong Kong Is Back」，點解好似未Ready咁嘅？
　　
最奇，咁大單嘢，周四全日都唔見機管局行政總裁林天福行出來解畫。其實就算未能查找到其原因，都應第一時間鞠躬道歉呀，呢啲只是基本公關禮貌及撲火ABC啫，點解唔做？難明！公關部阿頭冇畀建議大老闆？
　　
再睇睇香港國際機場過去幾年成績，原來真係好鬼皺眉，竟然在國際航空運輸研究機構（相當權威）嘅Skytrax世界機場大獎排行榜中，不斷下跌，跌呀跌，跌到第三十三位（曾幾何時，我哋好Top㗎），竟然連早年的「鄉里機場」深圳寶安機場及廣州白雲機場皆扒咗香港頭，真真情何以堪呢⋯⋯唉吔吔⋯⋯
　　
逝去了的都已逝去，唯有痛定思痛，望上周四呢單「爆鑊冇通知」事件，成為管理缺陷上的最底線，切勿再跌，然後積極改善，再作反彈啦。
　　
一切部署，蘇澤光主席與林天福總裁，百分之一百責無旁貸，請盡快定下改善藍圖，先公布，後落實。然後由三十三位爬返上頂！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。