古天后日誌｜瑞銀接手瑞信 仍要待市場信心回復

3月20日，歐美接二連三有銀行爆雷，雖然美國銀行擠提事件暫時解決，但歐洲嘅瑞信問題仍然發酵，令美股上周五借勢向下，三大指數下跌。道指喺金融股疲弱下跌384點；標指跌43點；納指則跌86點。雖然如此，但標指仍守喺3900水平，主要係債息回落，10年期債息減至3.47%，市場推測美國聯儲局非但無條件加大加息力度，甚至可能提前減息，資金由金融股流向科網股等高增長股。

上周五有消息指四間銀行暫停跟瑞信進行交易，為免歐洲銀行危機惡化，瑞士央行於周末期指火速行動，迫令瑞銀併購瑞信，最終瑞銀以30億瑞郎全面收購瑞信，瑞士央行向瑞銀提供1000億瑞郎流動性助，以及為收購瑞信帶嚟潛在損失提供90億瑞郎擔保。歐美銀行爆雷，歐美央行今次總算叫反應快，即時作出補救方法，以防止系統性風險發生，暫時要睇市場收唔收貨，能否阻止存款繼續流失，穩住市場信心。

今次歐美銀行爆鑊，主要係疫情發生後，歐美央行大大力QE，直至2021年已見通脹開始，仍未見兩大央行果斷停止QE，喺大量熱錢停留喺市場下，中小型銀行存款大幅急增，但舊年開始因為壓抑通脹，趕住加息，而初創企業無法於市場融資，自然就提出存款應付公司不斷要燒錢維持營運。但唔少中小銀行，以SVB為例，當存款大幅增加時，就大手買入國債跟MBS等長債進行投資，本來呢啲被視為無風險資產，喺加息環境下，債價急跌，但銀行又要應付存款流失，SVB只有賤價出售呢啲原作較長線投資嘅債券，導至出現虧損，而SVB表示因此要配股集資，自爆現金不足，嚇怕市場，中小型銀行出現擠提，其他中小銀行可以話被其拖累。

至於瑞信嘅問題，完全係管理層缺失，去年集團Q1已因為業務錄得虧損，但卻延至10月市況最差嘅時候先嚟配股集資，拖足兩季，搞到客戶及存款流失，百年基業就係管理層無能已毁於一旦。以為由瑞央提供高達4000億港元支援，應該可以渡過難關，偏偏歐央未有理會市場信心問題，上周堅持加息0.5%，搞到市場心息率高企，債價未能反彈。如今瑞銀接手，兩者合併，再由瑞央提出援助，應該可以捱過一劫。

相信經過SVB跟CS兩間銀行爆雷後，歐美央行今年餘下時間唔敢再加息，甚至提早減息，因為息率回落，債價方能回升，有助改善銀行資產負債表，至於通脹問題，當銀行為咗保護其資產負債表，應該會收縮借貸，市場少咗熱錢流動，油價及其他商品期貨價格唔再上升，通脹自然回落。近日回價跌到一仆一碌，已預示咗呢個現象。目前至怕係通脹演變為滯脹，央行要做不僅係停止加息，甚至要提早減息。

內地就率先喺周末期間降準，再次向市場放水，不過港股走勢偏弱，加上再失守100日線，大市係有機會進一步向下，回試19000及18500水平。港股要止住跌勢，重上100日線(19426)係基本，10日線(19620)變成短期阻力，至於要真正扭轉弱勢，250日線及20日線要修復企穩，暫時嚟講似乎未有咁嘅本事。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。