【曾智華專欄】笑爆嘴公關策略

周三有乜全城笑話？當然係某某港女，突然走咗去日本做女優，大拍鹹片，然後幕後班玩家高手，竟然度出條絕世好橋，膽生毛公布話獲得楊潤雄局長的恭喜。喂喂，
楊局長代表乜？正是代表香港文化、體育及旅遊！
　　
呢個作風大膽的港女，唔知背後有乜師爺，總之非常食腦兼作風誇張，更絕對懂得利用網上冇乜管制的空間，先而真空上街四圍散步，將片段掟上網，吸引好奇者（鹹
蟲？）眼球。
　　
當然志不在此，而是食大茶飯，最終目的殺入日本AV界，改個日本名，大鑼大鼓宣傳來自香港，成為講廣東話的女優，並加盟東洋AV大集團Faleno Star。
　　
一連串部署，相當出色，早早吸引到「鹹濕界」在網上轟傳其「真空遊街」片段。
　　
我有冇睇過？當然有。其時已肯定呢條片乃Teaser，更加重點目標即將曝光。
　　
你問小弟有冇興趣？真的，冇乜。因覺此女無論氣質與樣貌非常平平，難言吸引。
　　
但點都諗唔到，佢可以玩到咁大。
　　
偏門人物應該活在偏門世界，政府再豬豬都唔應該與佢哋「平起平坐」。
　　
尤其呢劑，女優及其背後師爺，擺明借政府過橋，將「文化局長」拉落水，製造Noise Level。
　　
喂喂，究竟政府有冇專業公關㗎？面對呢類「屎橋」，竟要出官方聲明澄清，然後再報警處理？哈哈，咁真係百分之一千「正中下懷」啦！
　　
結果，女優成棚人求仁得仁，立即因特區政府報警，成為國際新聞人物，紅到爆玻璃。然後，Faleno Star個Server，因無數鹹濕佬湧入而Down爆機咁滯。
　　
一切一切，乃最佳宣傳及反面公關教材。
　　
宣傳，極品高手出招。應付的公關，就真係⋯⋯唔該特區政府快「閉門思過」啦！

加拿大星島WhatsApp報料熱線：(437)428-9394

下載「星島新聞(加拿大版)」App，隨時看到最新最快新聞：
iPhone：https://apple.co/2IBi812
Android：https://bit.ly/2Pe8anu

訂閱加拿大星島網電郵快訊，每天可收到最快新聞資訊電郵： https://www.singtao.ca/subscribe/singtao.php

>>>訂閱CCUE YouTube 頻道，查看更多吃喝玩樂、生活資訊影片。