【曾智華專欄】心都碎埋

上周六相信不少馬迷似小弟咁，晴天霹靂，尤其練馬師方柏，更必定心都碎埋，因為最最最新香港馬迷偶像賈傑美，當日在澳洲墮馬，不省人事。馬會已經公布賈小姐不能策騎方廄馬「喜旺駒」，角逐全季極高獎金的打吡大賽。
　　
唔嚟騎一次，小事，反正來日方長。不過，最令人擔心，為賈小姐雖冇骨折，但腦部受震盪，手尾有幾長，未知。總之，大家一齊祈禱，希望佢吉人天相。
　　
今次事件，對我來講也有得著，就是學到一個英文生字——Sedated。因澳洲傳媒報道，賈小姐入院後，最新狀況為Remain Sedated。速速上網查點解，意即：to cause a person or animal to be very calm or go to sleep by giving them a dru（g用藥物令一個人或動物鎮靜或安睡）。
　　
誠心希望佢「瞓」完之後，一切全面回復正常，阿門。
　　
講講打吡，今屆真的令人興奮到震，因隻隻「大老虎」，兼且你知我知，如今全部評分皆虛虛哋，即大部分未露真身！幕後部署，一夠分跑打吡即冚手，以免在決戰前被敵方見到真章。因為呢項賽事，天文數字咁高獎金，榮譽也一時無兩，故此，各練馬師必定盡出奇謀，不單止跑實力咁簡單，陣上的謀略、部署及戰馬的狀態，更全部要「鍊」到最尖端。
　　
正常推論，多過一匹馬參賽的馬房較為著數。如此，蔡約翰出三隻，當然著數晒！再放大一點睇，「蔡氏宗親會」共有五隻，其他馬房肯定蝕底也。
　　
初步睇，只得「新力高升」有機會突圍。不過，睇多幾日變化先，周六再講講小弟的看法為何，因要知騎師配搭轉變也。
　　
今晚賽事，我特別鍾情一隻名字窩心的馬——「讓愛高飛」，快活谷千二米特強，上賽跑泥，純熱身，今場見真章！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。