【曾智華專欄】睇的辛苦，演的更辛苦

一如不少資深影迷/影評人預測，班頓費沙大熱奪得奧斯卡影帝。
　　
未決定入場睇《鯨》（《Whale》）前，我真的有多少內心掙扎，因明知呢套戲乃一個人在一間屋內做晒，擔心會好悶，更擔心睇得辛苦。因班頓為演《鯨》，要過非人生活。包括瘋狂谷肥自己，先令身軀及面部似個大波，然後每日花N小時穿上一件幾百磅重「人肉大衣」，再加特技化妝，講出都得人驚。
　　
不過，既然自認影迷，豈可唔睇呢套贏盡掌聲的電影？《鯨》去年曾參加威尼斯影展及多倫多國際影展。完場後觀眾全體起立，給予六分鐘掌聲致敬。事實，此片好評如潮，百分百受到全球資深影迷及業內人士肯定。
　　
終於在香港上映嘞。邊度有得睇？大眾化院線？一間冇，兩間又冇，第三、四間就算有，也可能只在冷門時間放一至兩場，真真嘥料！院商全面不看好票房？
　　
希望班頓得獎後，後上凌厲，愈跑愈有啦，如此才不會浪費了一套出色之作。
　　
《鯨》本來是舞台劇，主題關於愛與救贖。開場第一幕已極震撼，但見一個癡肥的六百多磅巨人Charlie，雖然坐在沙發上動彈不得，但竟正在觀看男同性戀色情片，然後千萬辛苦在自瀆，認真「重口味」。
　　
故事發展下去，原來佢經歷多重的生命創傷，包括男朋友逝世、被妻子拋棄、女兒因童年的陰影充滿仇恨⋯⋯結果，Charlie變成自暴自棄，終日狂食，滿屋是朱古力，炸雞一桶桶吞，十二吋披薩大口大口咬。
　　
但這個恐怖的巨人卻有顆善良的心。可能如此，吸引了一位護士好友Liz，自願每天抽空照顧。
　　
淡淡溫馨地描繪出人類的愛與原諒。好戲！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。