【曾智華專欄】匪夷所思求解釋

睇電影，小弟睇咗幾十年，乜嘢片種都有，算是影癡。睇得電影多，自然欣賞能力日比日高，故此，近年預測金像獎（奧斯卡及香港）得主，平均八成中。因為由製作到演技的高低，其實好易分，尤其行內人選出的，絕少離晒大譜，多令人口服心服。
　　
今早九點，一年一度奧斯卡頒獎禮又舉行，這個全球榮譽最高的獎項，當然萬眾矚目。
　　
大家可記得，上屆更是「矚目中的矚目」？因發生了韋史密夫驚人失儀的掌摑事件，搞到成個頒獎禮被騎劫，變為一鑊爛粥。
　　
基於此，今年大會特設「危機小組」，以防直播時有人發癲，失禮死全世界。
　　
今年睇所有「熱身」頒獎禮的走勢，似乎《奇異女俠玩救宇宙》又將橫掃奧斯卡。
　　
今日小弟真要問問香港的影迷，有幾多位明白，呢套「神怪片」有乜咁巴閉？有乜超級創意？有乜高段數製作技巧？以及戲中各人有乜令人讚歎的演技，竟能臣服美國一眾電影業工會：導演、演員、製片人及編劇公會，被一致推崇呢？
　　
此片在香港上映時，我當然有入場睇，一邊睇，一邊只覺得此片神神怪怪癲癲哋，且聞到一陣陣幾十年前極落後唐人街的「除」，令人覺得導演唔知想搞乜？
　　
最終小弟睇咗三分二，就拍拍屁股走人，覺得少少浪費金錢，事後也冇乜興趣提及。
　　
哈，匪夷所思，此片咁神經質，竟然被美國一眾電影專業人起立敬禮，推下推下，推到上雲端，譽之為電影史上不可多得的作品。
　　
而楊紫瓊更幾乎掃晒各個影后大獎。
　　
係真唔係真㗎？今日小弟公開徵求「啟蒙老師」，唔該令我開竅，得知吓呢部神怪片點解咁鬼掂呢？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。