【康子專欄】誰家無灶底，哪家不煲湯？

最憎那些殺人兇手，傷天害理，冇陰功，仲要衰冇公德心。

像先前提及的「灶底藏屍案」（3月3日《空間留下的記憶》），發生於1967年9月，左派暴動後不久。

當時的小朋友，出街已經飽受驚嚇：一怕示威暴徒。二怕通街「菠蘿」（「同胞勿近」）。三怕吃催淚彈。怕怕怕。不料暑假後開學，竟然來多一單「灶底藏屍」，報章日日大字標題，圖文並茂，真係唔得佢死。

小朋友特別驚。因為案件發生在「廚房」，又在「灶底」，家家戶戶都設有，平時煮飯炒餸的處所。

竟然暗藏碎屍！容乜易跌啲手指腳趾出來加餸，嚇餐飽。成為香港小朋友的「集體童年陰影」。

好不容易，幾十年過去，恐怖記憶沖淡。驚魂甫定，以為新一代小朋友，可以在安定繁榮的環境中長大。

不料忽然爆出單「煲湯」。豈有此理，「青紅蘿蔔湯」同你有仇呀！你屋企以後唔使煲湯嘅。今次搞到大人細路哥都驚，成功製造「跨世代集體恐怖回憶」。

又由於資訊發達，有蔓延全球各地的趨勢，成為另類「恐襲」。聰明朋友為此發噩夢，平時禁止談論，粗暴干預言論自由。

幸好香港人總有辦法適應。驚？除了日前建議，將兇案轉「科技台」/「偵探台」（2月28日《當鄰居發生兇殺案》）等。

仲可以轉「粵語片台」（《無頭東宮生太子》1957年），或「日本動漫台」（《銃夢》1990年至1995年），故事都係講一個「死人頭」。亦可以「低俗化」。當日找回人頭後，行山及水上運動人士，已放下心頭大石。不料在中環某燒臘店午膳，例湯赫然是「青紅蘿蔔」。燒臘師傅與女侍應鬥嘴：「攞埋你個頭落去煲湯！」
　　
並加句專業意見：「煲得耐會起膠。」全店上下哈哈哈，喪笑一場過去了，唔驚。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。