【曾智華專欄】買定大量啤酒花生

上周五TVB股價突然爆升，我的手機訊息也多到爆炸，人人互問點解點解呀？喂喂，一日升五成二，太過夢幻了。

眾所周知，如今做傳統廣播電視，真係三個字——冇得搞！因製作一個專業節目，又打燈又收音又化妝又服裝又攝影又場務⋯⋯貴到飛起。

但節目拍成之後，可以有幾多收視呢？有幾多廣告呢？能否賣埠呢？有冇傳世價值呢？全部一嚿雲。

以前TVB獨大，亞視跟尾，好節目，人人要擔定凳仔等睇，當年草根市民也沒有太多娛樂可以選擇。

結果，「晴天霹靂」！一切被科技摧毁。如今人人可以拍「電視」（專業與否不再重要），條條片成本低到不可再低，只要內容吸引，分分鐘鍊低電視台收視，廣告也可豬籠入水。

更甚，全球影視平台「五光十色」，搶爛市，月費平到你唔信。節目品種及內容多得眼花繚亂，水準又高，任何時候話睇就睇，咁⋯⋯請問傳統電視台生存空間還有多大？

TVB乃「大郵輪」，養千千聲全職職藝員，孭都孭死，條數點計都唔掂。故此，必須來一次營運模式的徹底改革，否則⋯⋯點能夠「轉
身」變返賺錢（莫講賺大錢了）？

TVB近年的問題，台前幕後皆非常複雜，甚至連上屆董事局的「古怪決定」也出現了。早前發出挑戰的「大台小股東聯盟」，公開信內確有不少疑點至今未能澄清。

利益申報，小弟也是小股東（因曾在無記工作，有著點點感情），如今股票被綁， 亦很想看到股東特別大會能夠召開，繼而為TVB的整體架構、政策、方向、市場⋯⋯來一次大手術，睇睇仲有冇機會變返個真正「香港人的電視台」。

我買晒啤酒花生㗎喇！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。