東張西望丨婆婆上門追身家細仔新抱用掃把打人報警即變臉 律師陪同落案終見曙光
TVB節目《東張西望》連續兩日報道80歲翟婆婆疑被初創公司CEO細仔，盜走家中近200萬元現金及金器後，連聯名戶口共約220資產亦被掏空，戶口僅剩921元存款，現在要靠大仔照顧過活。昨晚（3日）播出的一集，《東張》與翟婆婆和其大仔到細仔大角咀寓所對質，翟婆婆與大仔與細仔老婆一度起衝突，最後報警收場。
【其他閱讀】：東張西望丨80歲婆婆被CEO細仔偷420萬資產得返921蚊 上門對質新抱發爛渣掟爛咪
【點擊睇翟婆婆終見曙光】：
今晚（4日）播出的《東張》繼續跟進翟婆婆個案，翟婆婆與大仔到細仔寓所對質，當時只得細仔老婆在家，當提到錢時，細仔老婆即刻發難，更掟爛《東張》兩支咪，後來雙方報警處理。不過報警後，細仔老婆的態度突然180度轉變，對翟婆婆噓寒問暖，不過翟婆婆沒有理會，反問：「佢返嚟未啫？」不過細仔老婆沒有理會，在旁的大仔忍不住說：「我阿媽問梗你錢嗰啲嘢。」細仔老婆表示：「關心老人家健康先啦！我哋一心一意對你好。」大仔則反駁：「所以攞晒你啲錢、銀行簿。」之後大仔突然大叫：「你唔好嚟啊！我開門啊！攞掃把打我？我一世人都未（被）打過㗎！」由於鏡頭只能拍攝屋外情況，但從聲音得知細仔老婆以掃把打翟婆婆大仔，隨後繼續一輪口角戰。而《東張》團隊在門外一直嘗試聯絡細仔，但對方始終未有接電話。
其後三位警察到場，但態度似乎希望大事化小，其中一位警察更一度叫翟婆婆入稟小額錢債審裁署處理，不過有另一名警察似乎發現翟婆婆今次的涉案金額，遠超於小額錢債審裁署的7.5萬元限額：「直頭要去高等法院㗎喇。」之後在細仔家中找到翟婆婆的身份證及八達通，細仔老婆卻說：「唔知啊，呢個袋不嬲都放喺度，你搵到你咪攞囉。」在場女警向細仔老婆表示：「你第一句就同我哋講話唔知，之後又講得出啲嘢係佢嘅，又話佢畀你，你前言不對後語。」不過其中一位警察繼續說：「呢度你開唔到file㗎喇，點樣證明啊？合法挪用嘅話冇案㗎！」雖然大仔繼續反駁，但警察卻說：「你可以請教返你律師。」即使當場找到翟婆婆財物，警察亦無落案處理。翟婆婆在事後直指細仔老婆用掃把打人，將她推出門口：「可能佢心虛啩。」
明顯有盜竊成份
《東張》主持李旻芳隨後訪問陸偉雄大律師，問到聯名戶口是否其中一人可以隨便提款，陸律師表示：「喺銀行嘅角度嚟講係，但要先睇呢個戶口係點組成。阿媽（翟婆婆）好明顯係呢個戶口唯一存款人，個仔一毫子都冇貢獻過，加細仔個名純粹係為咗方便打理，產生咗信託嘅關係，細仔用任何錢都要同阿媽交代。」陸律師續指如果細仔將錢用作自己用途，是破壞信託關係：「呢種行為係屬於盜竊罪入面，較為嚴重嘅類別，如果佢真係被判坐監，佢會坐得長啲。」陸律師更表示今次個案明顯有盜竊成份：「好明顯，雖然佢（細仔）係戶口其中一個持有人，但佢身份只係一個代理人，工作只係保管或者管理呢筆錢。呢個戶口嘅組成已經有個目的喺度，你係唔駛將啲錢轉去另一個私人戶口，而且個戶口係你私人戶口，呢度正正有一個表徵，證明有可能當呢啲錢係自己嘅。」
陸律師得悉翟婆婆個案後，親自陪同她再到警署落案。進入警署逗留4小時後，陸律師終於成功說服警方，將案件列為刑事案件處理：「頭先去CID刑事調查科錄咗份口供，有可能交畀其他區處理，而家已經啟動第一步。」報案後，一直眉頭深鎖的翟婆婆成功落案後，心情似乎輕鬆不少，終於重拾笑容。到警署落案5日後，大仔獲葵涌警署聯絡，再次落口供。雖然司法程序或會擾攘多時，但翟婆婆終於能看到曙光。
>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。
iPhone：https://apple.co/2IBi812
Android：https://bit.ly/2Pe8anu
>>>訂閱【加拿大星島網電郵快訊】，每天可收到最快新聞資訊電郵：
https://www.singtao.ca/subscribe/singtao.php
>>>立即關注加拿大星島新聞網TG Channel，讓加國新聞無遺漏全天候向你推送：
https://t.me/singtaoca
>>>訂閱CCUE YouTube 頻道，查看更多吃喝玩樂、生活資訊影片。
