獨家丨薛影儀被黃榕帶壞推Job又開工遲到 出活動慘變義工亞視半放棄

薛影儀因為參選2021年《亞姐》被網民擁戴，去年更獲加薪轉簽亞視子公司AMM繼續做「亞視一姐」，並到大馬發展。不過，自從半年前跟陳冠希前度黃榕成為閨密後，有消息指阿儀就經常被榕姨帶去搵老闆飲飲食食，兼且獲安排在應該收錢的商業活動中做「義工」。亞視對於黃榕「買一送一」速銷計劃相當不滿，正視阿儀違約問題之餘，更怕她再闖禍，而榕姨就對天發誓冇消費阿儀。採訪：方騫平

上月14日，阿儀跟經理人林寶玉出席活動時竟遲到5個鐘。

 

去年阿儀獲加薪轉簽亞視子公司AMM繼續做「亞視一姐」，並到大馬發展。

 

阿儀去年連孭兩單官非，亞視出錢出力營救。

 

兩人扮聖誔女郎，在街頭擺pose放上網吸like。

 

上月14日早上10時，亞視安排薛影儀跟胡楓(修哥)、黃智賢及范振鋒於《獅心銀髮同樂日》活動中大派賀年福袋及寫揮春，不過，阿儀臨時通知公司話有事要晏啲到，至下午3時才施施然現身一粒鐘閃人，好有「巨星」風範。

在活動上派賀年福袋，開工1小時後即閃人。

 

活動中跟「最索經理人」林寶玉一齊寫揮春。

 

扭擰推公司Job

由於阿儀IG有超過7萬4人追蹤，阿儀出po幫到42歲榕姨添人氣及搵商機，難怪黃榕幾乎日日黐到實。據消息指，近期阿儀不斷為榕姨做「義工」，當中涉及唔少商業活動，由去年9月阿儀背住亞視，為個飯盒撐榕姨，出席中環海濱活動惹上無牌駕駛官非之外，近月兩人不時喺鐵打館鋪面、又喺「威吔」場打卡出Po，愈嚟愈離譜。同時，阿儀為咗榕姨開始失控，經常扭擰推公司Job，去年10月底甚至為Join榕姨的萬聖節活動而拒絕去新加坡拍戲；而本月中的大馬演出，阿儀出發前亦同公司講數話唔會去咁耐。據悉，阿儀嘅改變令家人感到莫名其妙，更對榕姨「洗腦大法」表示不滿，亦因此代阿儀向亞視道歉。

去年10月30日，阿儀拒絕到新加坡拍戲，選擇在榕姨嘅萬聖節活動上扮春麗。

 

由於萬聖節活動在鐵打館內進行，活動前一晚向傳媒發出採訪通告，亞視竟不知情即向黃榕了解。

 

上月中阿儀同亞視講好數，才肯去大馬表演。

 

去年9月，阿儀因為背住亞視出席黃榕叫佢去嘅電單車活動惹上官非，闖禍片段由榕姨拍攝嘅。

 

日前阿儀又跟「閨密」食盆菜賀新春，盆菜當然有sponsor。

 

榕姨知阿儀愛吊「威吔」，故投其所好。

 

撐黃榕撐到出口
 
阿儀接受《頭條日報》訪問時坦認出活動時遲到：「近排忙搬新屋有啲事晏啲到…都唔擔心畀人話大牌過修哥，啲學生都有過嚟搵我。」她又話近半年過得好充實，同阿榕、亞姐洪蓉蓉等玩得好開心。問到去黃榕安排嘅活動可有得到亞視同意？會否擔心跟亞視藝員合約有衝突？阿儀即背書咁背無限loop說：「同阿榕、亞姐洪蓉蓉等都玩得好開心，當朋友約出嚟玩，又去做吓『義工』咁，打羽毛球、桌球、保齡球唔使通知公司，應該唔會有抵觸，我同阿榕都玩咗唔少活動，公司都冇詐型相信冇問題，我唔驚公司會唔高興及追究。」阿儀仲幫榕姨幫到出晒面，直言：「我冇通知亞視，費事公司唔畀我同阿榕一齊。」

阿儀拍片講新年願望，不忘「奉命」交代「義工」身份。

 

黃榕帶阿儀入馬場見識及於會所食自助午餐。

 

阿儀好簡單，出嚟飲飲食食就最開心。

 

帶阿儀只係去玩

至於跟阿儀夾晒口供嘅榕姨在電話中說：「由頭到尾都冇利用過阿儀！」仲發誓同阿儀一齊冇涉及過金錢利益，堅持有錢收的只係收自己錢，而且都係租酒店慶祝聖誕、新年食飯、去生日會…自己去玩，她亦承認亞視有搵過佢：「亞視都有提出過要經佢哋同意，先可以同阿儀出席商業活動，我都明白及了解，咁係唔啱規矩嘅，所以會盡量避免，成日去鐵打館玩都係『義工』。」問到日後搵阿儀做活動時出事，係咪由她孭飛？她笑得尷尬說：「咁又唔好，始終做嘢交返佢公司好啲，上次電單車活動事件真係搞到好麻煩，但過咗去唔好再提…」她更寄語阿儀日後要乖乖哋以工作行先，幾時都有得玩。至於亞視經理人林寶玉對阿儀採取半放棄狀態：「我哋唔會左右藝人正常私生活，但如果藝人私下接Job違返公司合約，我哋一定會了解及處理。」

AMM正視阿儀違約問題之餘，更怕她再闖禍。

 

林寶玉在公在私都好照顧阿儀。

 

《星島頭條》APP經已推出最新版本，請立即更新，瀏覽更精彩內容：http://www.stheadline.com/

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。