星8卦｜「仙子」失戀愛上豪賭 大贏家鞋盒裝錢成佳話

「仙子」近年養尊處優，雖然一直風言風雨不少，但坐穩阿太寶座，其他女人都咪發夢。自細「仙子」想搵戶好人家，奈何從小成名遇上的都是有婦之夫，同「俊朗」苦戀多年，因為做第三者差點要退出娛樂圈。

好唔容易等到「俊朗」離婚，「仙子」竟然輸俾一個細自己廿年嘅北方佳麗，呢個打擊令「仙子」差啲崩潰，好在即刻有「大鱷」，同「老粗哥」一齊向詩人獻殷勤，「仙子」雖然享受大鱷照顧，但又嫌對方花心，終於揀咗嫁「老粗哥」，因為有個靚老婆形象大改，生意一帆風順。「仙子」趁仲有得生即刻三年抱兩，夫妻非常恩愛。

由於身邊無男人多年，加上俾「俊朗」刺激，好長時間「仙子」都鍾意周圍飛玩番幾手，未嫁前試過玩到3日唔瞓覺，好彩贏多輸少，繼續有好日子過。「老粗哥」婚後帶住老婆周圍威威，為搵食無乜生活情趣，「仙子」自然要佢融入自己世界，「老粗哥」有次跟住入賭場，唔駛一個鐘，「仙子」就贏咗佢成個月嘅收入，睇到佢眼凸凸，至於換番嚟啲現金點算呢？原來「仙子」早有準備，拎咗個細碼紅白藍袋填到滿，然後交俾「老粗哥」拎，嘩！手感非常好，因為自己成世人都未見過咁多金牛。

連續幾日，「仙子」好似開咗金庫咁，贏到要俾賭場列入黑名單，兩公婆返到房之後，發覺拎唔到咁多，惟有寄艙，但有乜方法安全又唔俾人發現，「仙子」將新買嘅手袋盒同鞋盒裝滿啲金牛，果然是神不知鬼不覺。最抵死係「老粗哥」好高興咁同公司同事講「原來搵錢可以咁易，得閒大家搵下呢啲外快都唔錯！」搞到跟咗佢廿年嘅開國功臣反晒白眼。
 

 

【相關文章】：

星8卦｜「孝哥」縱容爛賭老婆輸身家 妻債夫還捱到病

星8卦｜太太羅美薇神隱廿年 揭張學友狂推job之謎

星8卦｜模範夫妻爆離婚！小雲出軌發姣派帽 吉仔用成副身家箍煲

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。