【曾智華專欄】有人贏馬唔識/唔敢笑

贏馬不是好興奮的嗎？點解會唔識/唔敢笑？邊個咁違反自然定律呀？
　　
其實呢類場面久不久就見到，正是在拉頭馬的凱旋門。通常有頭馬拉，必定呼朋引類，喜氣洋洋，大家擺個V字手勢，然後馬主畀手指公讚騎練「叻叻」，好波！
　　
不過⋯⋯間中呢類場面，雖贏頭馬而馬主冇出現，正是爆出九十九倍大冷時！
　　
九十九倍？乜時候出現呢？正是隻馬「應該」輸硬，練馬師自己唔貼，亦叫馬主切勿嘥子彈，更多時騎師是水皮冷門一族。加加埋埋，咁就九十九倍嘞，間中更會百幾二百倍！
　　
大家想知小弟指邊場？容易，撳上馬會網，重溫年三十第八場，就見證影頭馬相時，馬主、練馬師及騎師皆唔識/唔敢笑場面。
　　
馬主唔識笑，因覺得走大雞之餘，更覺冇面！自己隻馬「海島材子」W得都一嚿雲，必畀老友柴台：「喂老林，得都唔通知聲，收埋食咁自私呀？」
　　
馬主只得苦笑，因被監生「屈」。最巧合，馬主個名叫林金錢，相信呢鋪肯定金錢「淋」走晒矣。
　　
另一個唔敢笑的，當然為練馬師姚本輝。隻馬一百一十一倍，幸好閘前完全冇「蠱惑飛」，否則……呢場爆胎味極濃，睇巡邏影片，見騎師馬雅並冇非常積極推騎，只是隻馬在直路自己衝W而已。爆到七彩，練馬師當然唔敢笑，以免被人懷疑「老點」馬主，然後收埋食，真又好，假又好，都要嗱口嗱面冇晒癮咁款。
　　
「海島材子」W完今次，有排唔使睇嘞，因加五分要「坐馬監」！
　　
拆拆明天萬眾矚目董事盃個局，不會三隻馬王排隊過終點咁簡單啩？我會用三勝一級賽的老馬「夏威夷」做Q膽拖之，睇天下第一高手莫雅表演可也！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。