【曾智華專欄】應發行三十元新鈔

未過新十五，當然日日要派利是。每天出外，小弟袋中必有三款利是：一百元、五十元、二十元，已經好多年「唔夠膽」派十蚊雞矣。
　　
派利是派咗四十年，睇住自己心態一路轉變。說穿了，就是由唔知點派、唔多願派，到非常開心又心甘情願地派，甚至追住人派，不是新年都幾乎日日派！
　　
初初的唔知點派/唔多願派，因每月收入不多，加上公司N咁多同事，參加活動又可能撞到上百生張熟李。若個個派，兩三個月人工都唔掂！所以，在公司時，只派畀向我拜年又或有直接工作關係的未婚同事。
　　
大家咪以為唔派利是的已婚者會好乞人憎，原來唔係！在港台工作時，正正有位已婚同事大大聲講：「各位，我絕不會派利是，你哋唔使向我拜年嘞，拜完都冇利是！」
　　
初初啲人聽，當然嘴藐藐。不過，一年之後，真係冇人再要求佢派利是。
　　
奉旨唔派後，根據觀察，哈，又不覺人緣差咗喎，過癮。
　　
我當然唔會咁做，因最想見到大家開開心心。尤其年紀愈大，經濟愈改善，愈覺得「派比逗更有福」，故開始周圍派。到便利店買報章派，到商場洗手間見清潔阿叔派，見到掃街阿姐又派派派……當然，到任何食肆晚餐更密密派。內容由二十元到一百元都有，視乎環境與關係而定。
　　
昨晚開年，老友肥D提出一個意見，頗有建設性，小弟百分百支持！
　　
「其實金管局應考慮發行三十元紙幣，因普羅大眾派二十元利是已經N年咁耐，隨著歷年通脹，頗覺不足。但若一跳跳上五十元，等於『加價』一倍半，實在極難負擔。呢呢，若果有三十元紙幣又唔同，立即解決『肉痛』問題，派與逗都皆大歡喜也！」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。