【曾智華專欄】「臭格」好惡頂

簡簡單單一件盜竊案，萬眾矚目，審N咁多日。過年前休庭，到二月二日再審。
　　
點解簡單盜竊案咁多人關注？因為被告夫婦背景絕不簡單，男的為骨科醫生趙名宇，女的則為醫管局女總行政經理莊慧敏。
　　
案情不便研究，但當中提到的「臭格」，令我立時腦海走入時光隧道，飛到上世紀九十年代。當時小弟曾經有八年時間擔任《警訊》主持，每集介紹警隊的制度、措施、裝備、分工……以至警署內一切。
　　
其中最「神秘」又冇開放畀人睇的，正是羈留犯人的地方，正式叫羈留所，俗稱是「臭格」。因被捕疑犯可能要長時間落口供，可能要在警署內磨四十八小時，當然要有一個保安森嚴的地方將犯人鎖起。
　　
《警訊》其中一集，正是介紹羈留所。小弟主動提議，與其正正經經以主持身分介紹，不如我扮犯人，由被捕拉上警車一剎那開始扮演啦。
　　
Camera一聲後，首先被上手扣，帶上衝鋒車。手被反鎖，加鐵扣會令手腕有點痛，此為第一「懲罰」。到警署後，進行一輪手續，就會被鎖入羈留所，等落口供。
　　
羈留所有N種人瞓過，包括流浪漢、道友、大賊……當然唔慌乾淨。加上內有馬桶，異味溢出，咪話唔惡頂，相信「臭格」之名正由此而起！若被通宵扣留，瞓的是硬繃繃凍冰冰的石牀。派的毯，N人冚過，大陣古怪味，一般人點敢冚？所以一個正正常常的人，若被鎖入「臭格」，真係苦過弟弟，雖則四十八小時，卻可能覺得被折磨四十八日！
　　
內裏唯一合乎「人道」的，是每餐有盒餐肉蛋飯，這已是羈留時的最高享受，問你怕未？我扮演完犯人後，同自己講，一世都唔好再入呢度呀！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。