【曾智華專欄】祝陳華棟大發神威

恭喜發財！兔年首次與大家見面，請先讓小弟拜年，祝人人身體健康，財源廣進，馬運亨通，買嗰隻中嗰隻（我都想呀）！每次賽馬，小弟一定黐住自己個iPad，全程只睇星島集團旗下的《賽馬日在線》。點解？因遠比官方節目過癮！
　　
長年從事傳媒工作，我當然知道節目要受歡迎，必須想法貼近市場，充滿娛樂性與趣味性，主持人更要各具特色，才吸引觀眾。
　　
《賽馬日在線》搞咗兩年幾，開始成形，各主持人性格鮮明，黃老總負責搞平衡（以防有人太出位亂噏）及睇「鬼鼠飛」。安西教練大情大性夠衝勁（最好見埋佢嗌馬時拍枱拍凳），仲達則提供扎實基本資料，女主持Win姐斯文淡定，軟化節目。
　　
而間中彈出的Colette則柔情似水，剛好與棟哥的麻甩佬款產生化學作用，至於亨利則神神秘秘𥄫住沙圈，提供八卦動態。以上各人搓埋，就是個娛樂性十足的直播節目。
　　
兩周前發生一件事，令陳華棟老哥好鬼㷫。因一次沙田賽事，佢提供的十一場心水馬，全部釘釘，奇唔奇？有啲。不過，強如潘頓及莫雷拉都周不時有「白果日」啦。
　　
結果網上班Haters多口反斗星針住棟哥嚟玩，玩到佛都有火，搞到佢唔再場場畀貼士。
　　
其實棟哥有料到，圈內皆知，佢經驗豐富外，更線路縱橫，又觀察力強，掌握邊啲馬在「排隊」（捧場客當然知佢講乜），提供的參考極之有用，如今激親佢老人家，真無謂。
　　
小弟一於祝棟哥兔年大發神威，等班Haters收口，咪再搞搞震冇幫襯！
　　
好，今日賽事又如何？研究最高班一場後，決定以「健康愉快」做膽，拖「中華盛景」、「一先生」及「包裝智威」！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。