【曾智華專欄】年三十發財心水馬

今日標題是否很吸引？你可能有以下反應：一、發夢冇咁早！二、真的嗎？睇吓先。三、有乜馬咁大信心啊？
　　
嘻嘻，真係有多少信心㗎！主要研究的，是第四班一千米。
　　
兩年前一位賽馬專家同我講：「碌Sir，其實貼馬，最易是沙田一千米賽事。因跑道好怪，並非隻隻馬識跑，選馬，首選曾有往績的馬已經掂。其次就是擅跑此程的騎師，一千米的留放好蝦人，絕難一啖氣由頭跑到尾，出閘後留守乜位及幾時發力，至為重要。」詳細研究呢場後，我睇只得五隻有W的機會：
　　
一、「不可擋」：一千米專家，去季至今跑九次，一W、兩Q、四P，準到飛起，多經希威森手。上次換鍾易禮變第九，因放得太快，後勁不繼。休息三個月回氣，四歲馬，坐位。
　　
二、「魅力一丁」：今季主攻一千米，應是練馬師的判斷，此程曾入Q。再報一千米，唔似講玩，四歲馬有上升空間，也是坐位的馬。
　　
三、「你知我拼」：上場初出，大熱兩倍勝出，澳洲高手麥利奧騎功犀利，因隻馬擺明仍生，不太知競賽為何物，結果險勝短頭，贏埋唔夠買驚風散。有咗一場經驗，今次應更好。
　　
四、「萬里飛至」：馬本平庸，前季六十八分起步，跌到今季四十九分，轉五歲後，開始處女勝利，至今一W、三Q、一P，全皆跑一千米。上次排一檔，非常之劣，仍剷入第三，此場也是坐P之馬。
　　
五、「風流人物」：一千米專家。前季首次亮相，即贏一千米，之後沙田一千米曾三Q、二P。今季十二月初出，先跑一場快活谷短途，擺明熱身，今次起筷！
　　
以上五隻，大家可買二重彩複式，又或以「你知我拼」及「風流人物」做雙膽拖。祝好運呀！兔年年初三再見！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。