世界盃2022｜專家分析:巴西八強「大」跳森巴舞

巴西上仗對南韓精兵盡出，最緊要係尼馬復出，佢可以話係球隊進攻嘅催化劑。「森巴軍團」上半場玩弄明顯有疲態嘅「太極虎」出神入化，攻勢組織行雲流水，四個入波都非常高質，睇到艾爾賞心悅目。八強將會面對上屆亞軍克羅地亞，艾爾覺得巴西仍然比較上風。

無論尼馬、雲尼斯奧斯祖利亞、拉芬夏比洛尼等球員喺邊路嘅盤球同爆破能力強，左右兩邊都開到弓，克羅地亞嘅閘位球員會非常吃力。至於上場有入波嘅李察利臣，今仗對住對面兩個頗為硬淨嘅中堅路夫雲同加華度爾，應該無乜甜頭。只不過，巴西進攻點夠多，入球方面唔太擔心。

克羅地亞上仗憑較好嘅心理質素，喺互射十二碼階段淘汰日本。自從上屆歐國盃之後，艾爾覺得「格仔兵」更着重穩守突擊，效果都唔錯，近二十場賽事只輸一場。事實上，龍門利華高域、中堅加華度爾、中場莫迪歷同前綫比列錫嘅表現穩定，球隊比之前更穩紮穩打。不過，克羅地亞陣容平均年齡較大，後備球員實力亦一般，面對如日方中嘅巴西，相信係球隊今屆最難踢嘅一仗。

巴西前綫夠活力，兼有堤亞高施華同馬昆奴斯哥利亞守住後防，前中後三綫實力平均。講埋門把握力，巴西亦較克羅地亞強，可能再大跳「森巴舞」慶祝入四強。

投注角度嚟講，去到淘汰賽階段，讓球盤讓得太多都係避之則吉。今場巴西讓一球球半，上盤就唔係艾爾杯茶喇！直接諗全場入球大細「2.5」大，另外可以博下雲尼斯奧斯「入球」嘅首發事項。　　—艾爾

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。