【曾智華專欄】江玉歡彈離跑出

昨日講到大群資深傳媒人飯局，兩杯到肚，玩記名。記乜名？正是應屆立法會新任議員的名字，並要求講得出佢哋做緊/過乜？
　　
因為佢哋手執投票大權，月收納稅人過十萬元計薪酬福利，個個上任前承諾為民請命。咁，講完唔可以當食生菜喎。究竟做過乜，全部都必須來次「陽光測試」，此乃市民對公職人物的基本要求！
　　
結果，弊傢伙！埋單計數，竟然有三十五個新議員名字，冇人唸得出，當然更遑論知道佢哋有乜貢獻、主張……嘞。究竟點解「搞成咁」？唔好問我，佢哋及你哋（香港市民）應該各自思考。老友，議員絕不可只是副白逗人工的舉手機器喎。
　　
好嘞，咁新議員之中，又是否一個都冇畀人覺得佢「有做嘢」呢？又唔係。有一個，明顯跑出的，正是早前對防疫政策「唔跟大隊」，敢於挺身指出政府「甩Q」的律師議員江玉歡。
　　
留下印象，因畀人覺得佢並非一般「橡皮圖章」，當然更不是「忠誠廢物」，應發聲時就發聲。
　　
呢呢，上周佢又走去馬草壟落田耕種，第一身了解村民面對「收屋未收地」的困境，並指出政府的賠償計畫不公及離地之處。
　　
「佢係咪做騷？」有人問。小弟認為，問者個腦有多少問題，因為——Politics Is A Show。乜都唔想做，只想收人工者，唔該Get Out！
　　
個個對江玉歡有深印象，當然引起小弟好奇，查查佢背景。一查之下……咦，乜原來呢位議員出身都幾坎坷喎，非常不一般！
　　
江議員孤兒出生，一出世就被養母領養。十一歲已要在官涌街市賣麵包幫補家計。在如此困難情況下，仍能考入香港大學法律系，毅力及鬥志肯定絕不簡單！
　　
江玉歡的「彈起」，因在今年九月時，高調批評政府在處理免針紙方面「兒嬉及專橫」，破壞法治。言論一出，立即被建制中的建制指做「猴戲」，開始被排斥、孤立。
　　
其實這種敢言及不跟大隊的作風，才是市民對議員的要求。江玉歡的跑出，正正反映昨天提及的「隱形議員」冇乜料到！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。