【支联会拒交资料案】邹幸彤自辩全文:我们就是自己的主人

已解散的支联会前主席李卓人、前副主席何俊仁和邹幸彤被控煽动颠覆国家政权罪,首提堂至今还押逾一年,3人拟不认罪,早前获交付至高等法院审讯。李卓人申请保释被拒。同案被告何俊仁及民主党前主席刘慧卿等今到庭旁听支持。

被告支联会、李卓人(64岁)、何俊仁(69岁)和邹幸彤(36岁),被控于2020年7月1日至2021年9月8日,在香港煽动他人组织、策划、实施或参与实施以非法手段旨在颠覆国家政权的行为,即推翻、破坏中华人民共和国宪法所确立的中华人民共和国根本制度,或推翻中华人民共和国中央政权机关。

网上媒体《独立媒体》报道,警方国安处去年指有理由相信支联会是“外国代理人”,要求7名支联会常委提交资料被拒。已解散的支联会前副主席邹幸彤等3人否认一项“没有遵从通知规定提供资料”罪,被国安法指定法官、主任裁判官罗德泉裁定表证成立,12月6日于西九龙法院续审。

本身是大律师的邹幸彤在证人台作供,强调支联会由始至终都是港人自发组成的团体,“绝对唔系咩外国代理人”;又指坚持五大纲领是为了中国和香港的民主自由,“何解可以话系外国嘅利益呢?”

以下为邹幸彤庭上作供的全文,由《独立媒体》记者整理及誊写,部分庭上对答经删节。

我们就是自己的主人

我今日要出嚟畀口供,其实只要讲清楚一个事实,我哋支联会绝对唔系咩外国代理人,亦都冇可能有任何合理理由话我哋系外国代理人。

首先要讲少少个人背景,点解我畀到呢方面嘅证据。我本人2010年初大学毕业就加入支联会做佢地嘅兼职,做咗几个月之后就离职,但离职之后都一直做义工。2014年底我参选同当选成为常委,2015年底当选成为副主席,并一直喺同一个岗位上直到旧年,即支联会被强制解散嘅时候。可以话过去十年几我都喺支联会大大小小嘅岗位上度过,对于佢系一个咩性质嘅组织同点样运作都有相当了解。

咁支联会到底系一个咩性质嘅组织呢?我哋系成立喺1989年𠮶场席卷全中国嘅民主运动之间,由始至终我哋都系香港人自发组成嘅团体,而唔系咩外国派嚟嘅代理或者棋子。睇返我哋嘅名字都好清楚,我哋全名系“香港市民支援爱国民主活动联合会”,好明显组织嘅主体一直系香港嘅市民。支联会系香港之子,发出嘅系香港人嘅声音,所做嘅系香港人嘅选择。

从我地全名都见到我哋系一个“联合会”,我哋系由好多民间团体成员组成嘅联合平台。喺好长嘅一段时间里面,我哋都系有超过200几个成员团体。支联会章程架构其实同好多普通民间团体系差唔多,会员大会系我哋最高决策机构。日常运作主要系由常委会负责,我哋常委会系由会员一人一票选出嚟,任何会员团体都可以派人参选或提名任何人参选。可以话我哋嘅选举制度比某啲完善咗嘅制度系更加民主同开放。

如果话一个咁样由大量公民社会组织、民主组成同运作嘅团体系外国代理人嘅时候,你侮辱紧嘅其实唔系一个组织或者几个常委,你系侮辱紧成个香港嘅公民社会,抹杀紧公民社会嘅自主性。

呢度有支联会章程、详细运作嘅规范框架,系好容易喺公司注册处攞到嘅文件。我想法庭留意入面讲到,支联会所有收入同财产,无论系来自任何来源,都系只能用于推广组织本身嘅目标,所以不论收入来源自何方,我哋只能服务返我哋组织本身嘅目标,而唔系服务一个唔知乜水嘅利益。

我喺支联会咁多年,无论系作为一个职员、义工、常委定系副主席,我都冇见过任何外国政府或外国政治组织可以过嚟指点我哋做嘢。我哋常委之间成日会有好多唔同嘅意见,会员都有好多唔同睇法,咁我哋咪喺我哋章程架构下面开会囉,我哋去讨论攞共识或者投票决定囉。咁样嘅决策过程点样可能一直代表紧一个特定嘅他者嘅利益呢?而且仲话三十几年都系代理紧呢个主子?除非你话我哋呢啲章程、我哋所有开会投票都系做戏嘅,咁先有可能啫。我哋自己就系自己嘅主人,从来唔系任何人嘅代理。

明摆摆的政治迫害

咁当然啦,抹黑我哋系啲咩外国势力或者外国代理人,从来都系一啲党媒最常用嘅手段。所以早喺国安出信比我哋之前,已经有一啲《文汇》《大公》呢啲媒体作啲假新闻话我哋系外国代理人。个逻辑似乎系只要将所有嘢归罪比外国势力,就可以抹杀任何诉求嘅正当性,可以盖过六四屠城嘅罪行,妖魔化追求民主嘅声音。

官:你最好用中立嘅字眼去形容(六四屠城)。

邹:喺我证供同理解入面,呢个唔系中立的,喺我理解中,呢个系一场屠杀(massacre),而我坚持(stand by)我嘅理解。

当呢啲抹黑出自冇公信力嘅媒体,我哋觉得睬佢都无谓嘅,费事帮佢宣传啦。但而家个问题系公权力都插一脚,用同样莫须有嘅指控去抹黑同逼迫我哋。国安出本案通知时、喺对我哋拉人封艇嘅时候,从来无话只系怀疑或者调查紧我哋系唔系外国代理人,而系实牙实齿话我哋就系外国代理人。我呢度有当时相关机构或官员嘅发言想呈畀法庭。

第一份系保安局局长2021年9月7日对传媒讲话,喺我哋被捕之前,佢主动提起支联会:“这些人我们定义为‘外国代理人’,其实《实施细则》附表5内说得很清楚,什么是‘外国代理人’呢?即一些人受到一些外国政治团体的金钱资助,从而为外国的利益进行一些活动。至于我想说相关人士有否进行这些活动,我相信大家的眼睛都是雪亮的,亦看得很清楚。”

唔系怀疑、唔系查紧,系定义,而且话系任何人都可以睇得好清楚嘅事。之后记者再追问有咩实质证据话支联会系外国代理人,邓炳强重复讲:“我很相信日后大家在法庭上就清楚看到,究竟这些人是如何去收取一些外国政治团体一些金钱或其他利益,从而为他们的利益进行活动。”

局长嘅讲法都相对客气啦,国务院港澳办系讲得更直白。佢地喺呢份2021年9月26日嘅文件,话支联会就系外部势力嘅“急先锋”同“马前卒”。好明显,公权力早喺旧年9月已经有晒定性,并且好急不及待要喺𠮶时就昭告天下。但到而家过咗成年几,我哋真系嚟到法庭,我哋真系清楚见到嘅系咩啊?系政府话佢根本证明唔到支联会系外国代理人,亦都唔需要证明支联会系外国代理人。

咁邓局长头先嘅说话算系啲咩呢?而当时政府同官方铺天盖地嘅抹黑又算系咩呢?即系邓炳强讲上述𠮶啲说话嘅时候,佢明知系冇足够嘅证据支持佢嘅说法但都照样作出呢啲咁不负责任嘅指控,而基于呢啲莫须有嘅指控拉人封艇、封网、强制解散。等所有伤害造成之后、不可逆转之后,先至嚟话“我哋证明唔到我哋嘅指控架,你吹咩?”,咁样嘅做法唔系明摆摆嘅政治迫害又系咩?

不是两万元可收买

过咗成年几我哋起码知多咗少少国安表面上用咩理由话我哋系外国代理人。根据洪警司嘅证供同提交嘅文件,佢地指控我哋系一个“组织4”嘅代理人,而所依赖嘅事实只系三点,一系话我地收咗呢个组织嘅两万蚊;二系话我哋都系因为六四成立;三系话我哋有相同目标。其实三样嘢之中只有一样显示两个组织可能有接触,咁呢笔咁罪大恶极嘅钱系咩一回事呢?支联会嘅帐目一直系好清楚的,我哋一查都可以知道。

洪警司话支联会2018年12月22日收到“组织4”两万蚊,睇返我哋记录,我哋当日有收到一笔两万蚊现金捐款,捐款者系自称“民主中国阵线日本分部”。收据清楚写明,呢笔系六四纪念馆捐款,而唔系啲咩资助。法庭当然未必清楚呢笔捐款嘅背景,我哋当时其实系做紧一个六四纪念馆嘅扩馆众筹,系自2016年已经开始,目标系筹款300万支持我哋䐟买一个永久六四纪念馆嘅馆址。而我哋最终都喺2019年筹集到足够嘅款项,购入我哋最后喺旺角嘅六四纪念馆馆址,亦即系话呢一笔捐款系我哋差唔多三年众筹计划入面其中一日嘅一笔捐款,系帮我哋比到四百分之一嘅购馆费用,馆址大约800万。

呢笔捐款当然系重要啦,支联会嘅所有经费都系来自于公众嘅捐款,每一分每一毫都同样重要,但同时间佢都系一笔毫无特别之处既嘅款。我哋完全冇特别理由拣个捐款者出嚟,跟住代理佢嘅利益。如果话捐亲款畀我哋,我哋都要代理佢哋嘅利益时,咁我哋都真系会好唔得闲啦。(笑)我亦都谂唔明白我哋点可能同时代理成千上万捐款者嘅利益。

支持者认同我哋嘅理念同工作而捐款畀我哋,同埋话我哋因为收咗人哋钱而去服务人哋嘅利益,系两件性质同方向都完全唔同嘅事情。唔通话我哋认同天安门母亲诉求同会捐钱畀佢哋,天安门母亲就会系我哋嘅代理人咩?都唔知国安系唔系太睇少我哋啦,我哋支联会虽然唔系啲咩大机构,但都唔系区区两万蚊可以收买到。就算唔计六四纪念馆呢种专项筹款,我哋平常嘅洗费、人工、灯油火蜡,场租、保险等,其实每年系几百万走唔甩。

根据2018/19年度嘅核数报告,包括收到呢笔款项时,有提到当年购买艺旺道一个物业,作价800万,2019年7月31日交楼,就系刚刚提到众筹计划结束后购买嘅物业。我哋当年收入有470多万,支出约339万。当年盈余系相对多,一来系所谓大年,六四三十周年,一个整数年份;二来系当时储紧钱买六四纪念馆。但就算比较平常嘅年份,三百几万洗费基本系走唔甩。我哋支联会运作咗32年,每年起码几百万经费,仅仅话我哋第29年收过一笔两万蚊嘅捐款,就无啦啦成为咗𠮶个捐款者嘅代理人,呢个讲法一讲出嚟都知系荒谬啦。

合作并非从属

而洪警司依赖嘅另外两点,话两个机构有相近历史同目标,要回应系需要两个机构嘅资料去比较,但我当然只可讲到支联会𠮶边。好清楚,支联会唔系因为六四先成立嘅,我哋亦都从来冇用过咩“重建民主中国,结束一党统治”咁样形式嘅口号。当然我哋可以好大方地承认,即使洪警司嘅讲法唔系好准确,六四对我哋机构确实系一件好重要嘅事,而建设民主都系我哋好核心嘅目标,但个问题系呢两样嘢点证明我哋系服务紧其他人嘅利益,而唔系只系遵循紧自己嘅目标而行事呢?六四屠城系一件客观存在嘅事实,佢影响咗亦都影响紧成千上万嘅人,而民主更加系世界上无数人共同嘅追求。唔通话历史理念相近嘅组织必然有代理关系?

理念相近嘅民间组织确实成日会行埋一齐,一齐合作搞活动、做联署,或者互相支持对方嘅行动,咁始终团结就系力量。但呢个系健康嘅公民社会下再平常不过嘅自由合作,用代理呢种从属关系理解系搞错晒。

支联会一直好公开同好多民间组织合作,不论系本地定国内、国外嘅。香港一直系一个国际城市,我哋完全睇唔到任何理由要画地为牢,将所有国际嘅同路人视作系洪水猛兽。咁唔通只畀国家领导有外交,公民就必须倒退返去闭关锁国嘅年代咩?

但国安呢个指控最令我哋啼笑皆非嘅位其实系,支联会合作过嘅机构有咁多,佢哋竟然拣咗一个可以话系“三唔识七”嘅组织话系我哋主子。如果我哋要代理一个机构,我哋起码要同佢有紧密嘅联络啦,如果唔系点知佢哋嘅利益喺边啫?但起码我做常委咁多年,我冇喺常委会议上听到呢个民主中国阵线呢个组织嘅名。我哋同呢个组织系冇沟通、冇合作㗎囉。(笑)正如刚刚讲到,支联会有好多合作开嘅团体,但呢个合作开嘅圈子其实系冇民主中国阵线嘅。

呢度有两份声明,第一份系2018年6月2日,六四廿九周年嘅联署声明,联署团体有31个,香港21个、海外8个、内地两个,系冇“民主中国阵线”。另外一份2017年8月13日,系刘晓波先生逝世周月嘅声明,刘晓波先生嘅事情得到比较多国际关注,有好多国际联署者,呢度有45个联署团体,来自中、港、台、英国、美国、加拿大嘅国际组织,都系冇“民主中国阵线”。

呢两份联署算系支联会近年发起比较大型嘅国际性联署,但我哋都冇话去揾呢个民主中国阵线,因为好简单,真系冇联络开囉。(笑)我哋完全唔知道佢哋组织嘅状态啊、边个负责啊、点样联络啊,甚至如果唔系国安讲,我哋都原来唔知香港有个分部。

同行的承诺

去到最后一个议题,咁要理解支联会到底系为咗啲乜嘢进行佢哋嘅活动,系咪真系为咗所谓嘅外国利益,最好嘅办法莫过于睇返支联会讲咗啲咩。

呢度有份文件呈比法庭,系六四27周年烛光集会场刊。我想法庭留意嘅系里面嘅大会宣言,但大会宣言之前都顺带提一提嘅,其实两页纸嘅场刊我哋当年都用咗半版纸宣传当时扩馆众筹嘅计划。

返去大会宣言,呢份大会宣言系我担任支联会副主席之后第一份撰写嘅大会宣言,比较有系统地阐述咗我点理解支联会使命同工作。我都想读返几段:

宣言提到,“二十七年。面对暴行,有人反抗、有人逃避;面对冤魂,有人悼念、有人遗忘;作为生者,有人选择继承死者遗志,有人说与我何干;作为港人,我们是选择背负责任还是背转身走?责任无法强加,选择自有难易。这些年来,平反六四、结束专政、建设民主不只是支联会的口号,更是国内不少仁人志士身体力行的追求。为此他们被囚禁、被驱逐、被酷刑、妻离子散、被社会孤立,却仍未有放下这副他们自愿挑起的担子。”

宣言后半讲返我哋喺香港要做嘅野:“这一刻,正正是我们该和国内无数反抗者站在一起的时刻。结束一党专政不仅为了中国的民主,也是为了香港的自由。

“对于前线的抗争者、民主路上的先行者,我们不能让他们孤单抗争,这里面有我们每个人的选择。像苗德顺、丁子霖、浦志强、像我们这里每一个人,我们都能随时选择放下,不再触动强权的神经,然后安然度过自己的日子。这是选择,无关身分、亦非必要,但大家却选择了来到这里。

“感谢大家,在看不到尽头的长夜,仍选择坚持;感谢大家,在面对自身困境时,仍选择关怀;感谢大家,在利益和权利面前,选择良知。我们无法承诺天明,却能承诺同行,直到六四真相大白、刽子手面对审判的那天;直到一党专政终结、政治滥捕结束的那天,我们会一直坚持:释放民运人士、平反八九民运、追究屠城责任、结束一党专政、建设民主中国。

呢份宣言主要有三个关键字,“选择”、“承担”、“同行”。作为一个追求民主嘅组织,尊重每一个人嘅自由意志、自主选择,系我哋立生之本。选择支持我哋、同我哋同行,我哋会欣喜感激,因为我哋知道唔系必然,亦都唔容易。而选择离开我哋甚至反对我哋,我哋都会尊重同埋反省,而唔系学似政权咁,将所有反对嘅声音,归类为冇自由意志嘅代理,或者被煽动嘅愚民。

而我哋选择去承担嘅到底系咩呢?宣言讲得清楚:“为了中国的民主,也为了香港的自由”。即使夹硬要用利益嘅语言去形容,中国嘅民主、香港嘅自由,明明白白地系呢片土地上、呢个国家上面人民嘅利益,何解可以话系外国嘅利益呢?将我地嘅民主同自由讲成系外国嘅利益,我唔知应该话呢个外国太好心,定系话呢个国家嘅人民太过卑微。

而我哋都作出咗同行嘅承诺。作为无权无势嘅普通人,我哋冇办法承诺即时嘅改变,但我哋可以承诺一直同所有同样选择为民主去承担嘅人同行,不论佢地喺香港、国内定系喺海外,亦不论系生者定系亡者。呢个系我哋守咗33年嘅承诺,并将一直守落去,无论组织嘅存亡。

同行嘅前提系平等同互相尊重嘅关系,最起码系唔会用金钱为同行者划分三六九等,唔会话你捐钱多就大声啲、唔捐钱就冇声出。其实恰恰相反,喺我哋呢种理念先行嘅团体呢,净系捐钱嘅人其实系冇任何话语权,反而系𠮶啲付出时间同精力喺个机构上嘅人,先至会影响到个组织嘅发展同方向。而我哋系本案入面所作嘅所有选择,亦不过系贯彻紧呢个同行嘅承诺。

国安嘅通知系出畀支联会,但佢所带嚟嘅恐惧同威吓并不会只停留喺支联会嘅范围。一来我提到过,支联会系一个联合会,而且系一个喺香港公开合法地活跃咗三十几年嘅联合会,同支联会有关系、有联络嘅人又何止系成千上万呢。当国安通知要求的资料范围系如此空泛同广泛,无论系时间上定内容嘅广泛,受影响系成千上万人嘅私隐,个效果就系起晒成个公民社会嘅底,令到人人自危。

二来政府嘅逻辑好明显系倒转嘅。唔系话你真系同外国有咩联系所以你系外国代理人,而系因为你讲嘅说话政权唔啱听,所以你必须系外部势力。政权一日唔肯承认香港人可以有自己独立嘅思考同声音,外国代理人嘅范围只会越划越大,要面对国安呢种无理要求嘅人只会越黎越多。

我哋嘅反抗或者系螳臂挡车,但如果可以令到横行嘅权力多少有所收敛,唔能够咁轻易被滥用外国代理人呢种标签,我哋都总算守住我哋嘅承诺。至起码啦,我哋要为呢个时代留低一个纪录。

面对滥用,我哋要站起嚟阻止佢,并同每一个人同行,保护大家。我哋嘅回应,唔止系关乎我哋机构,而系关乎对整个公民社会嘅影响、关乎政权滥用权力,而我哋作为普通市民可以点样阻止。透过咁做,我哋系同每一个可能受滥权所害嘅人同行。

我哋有需要喺呢个滥权嘅时代留低一个纪录,即使系用人身自由为代价。

点击以下6大平台 接收加拿大新闻及生活资讯
加拿大星岛WhatsApp报料热线:(437)428-9394

下载“星岛新闻(加拿大版)”App,随时看到最新最快新闻:
iPhone:https://apple.co/2IBi812
Android:https://bit.ly/2Pe8anu

订阅加拿大星岛网电邮快讯,每天可收到最快新闻资讯电邮: https://www.singtao.ca/subscribe/singtao.php

>>>订阅CCUE YouTube 频道,查看更多吃喝玩乐、生活资讯影片。
share to wechat

延伸阅读

share to wechat

延伸阅读

积极抢票!杜鲁多宣布三大政策助租房者

联邦自由党预算公布策略转型 针对年轻人推销“世代公平”

截止日前4天!加拿大税局突暂停申报代持信托规定

加拿大外国干预听证会 侨民代表说明遭恐吓迫害

都市网新闻