古天后日志｜港股万九水平整固 恒指18000至18400有一定支持

12月8日，大致天晴，早晚清凉，天气干燥，日夜温差较大。美股隔晚反复靠稳，三大指数变动唔大，仍然系纳指表现较为落后，标指守住3900水平，目前仍然喺3900-4100之间整固，成交则偏静，应该系议息前大家都唔想出手。科技龙头股表现麻麻，苹果公司正削减iPhone供应商订单，市场担忧iPhone销售不似预期，股价出现3连阴，已跌至140美元水平，一旦失守，唔排除进一步下试135美元寻找支持。另一龙头Tesla表现亦疲弱，打击科技股投资气氛。

美国10年债息跌至3.43%，只系债息下跌未见对息敏感嘅科技股带嚟支持，反而科技股表现继续疲弱，反映市场之前博科技股反弹嘅资金离场。主要系CPI数据虽然已见顶，但回落速度较为缓慢，资金自然唔会太进取。尤其系反映喺CPI部份嘅房价有一定滞后，呢个亦系CPI喺10月份仍高过预期，直至11月CPI先反映房价房租开始回落嘅因素。估计未能几个月，CPI回落速度应加快。

至于港股呢边，㖊日又嚟一次反高潮，恒指㖊日午后一度因为内地公布优化防疫措施而急升至19800水平，只系市场憧憬嘅开关并未有任何公布，大市冲高后获利盘涌现，最终高位回吐近千点，恒指更跌至全日低位18814收市。港股呢一转由17000点再起步，至昨日升抵19800水平，已超额完成古天后预期范围19500点，而㖊日出现嘅呢枝大阴烛，对短期升势有一定破坏，北水录得单日净流出50亿元，早段追入嘅资金，再变成韭菜待被收割。

不过港股升抵万九水平后，成交仍然keep住喺1500亿以上，可见市场不乏资金，只系进入高位19000水平，入市资金变得更审慎，亦需要时间消化急升后，现货已出现超买。呢两日资金开始由一线股份流入二线股份炒作，嚟到呢啲时候又要提高警觉。内地㖊日公布完优化防疫措施，短期应该唔会再有咁多政策出台，始终仲有个几月就过年，要待春节过后，先会再有新政策出台。估计呢段时间，又开始接近圣诞节长假期，节日气氛渐浓下，港股而要回调抖气，短线支持系10日及100日线，大约系18400水平左右，而好友嘅最后防线，将会系20日线，即18000水平，只要呢啲位守得住，后市仍有机会以一浪高于一浪嘅方式向上推进。

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。