【曾智華專欄】佢哋做緊/過乜？

兩年前，凡任何飯局，都有人提出玩唸名字遊戲，唸乜？正是Mirror十二子名字。最熱衷參與的，皆為女性，由十六歲到六十歲皆興致勃勃。絕大部分記憶力驚人，十二個名，一字不漏，全中！
　　
究竟點解佢哋咁犀利？讀書、工作，甚至社交時，要記人名，又有冇如此超強記憶力的呢？
　　
多年前香港政壇風起雲湧，我哋傳媒人，尤其做政界訪問的，必會認識所有議員名字、面容、背景、政治取向。當然，邊個有料，邊個符碌，更了然於胸。對於後者，當然唔會嘥時間搵嚟訪問，大膽講句，我講好過佢講（唔使扮謙虛）！
　　
好嘞，發展到如今，選舉制度「完善」咗，議員數目又大幅增加咗。咁究竟一般人，包括傳媒人，對新一屆議員又有幾多認知呢？喂！佢哋做咗成年喇！
　　
上周成群資深傳媒人歡聚，飲咗幾杯，又開始玩記名遊戲。今次當然唔係玩Mirror，而係玩應屆立法會議員。呢群選舉時信誓旦旦，承諾服務社會，為民請命之士，到如今，先不論究竟有幾大貢獻，但作為政治人物，最低要求，係有人識你，知道你攞咗個投票權加十萬元計薪酬，做過乜？老友，千祈咪扮「低調」呀。議員天職乃服務社會，若你「低調」到隱形咁款，市民要求助，難道搵空氣？
　　
好嘞，記名遊戲開始！
　　
真真死火，舊議員，大家記得七、八成。新議員？真該煨！以下名字，全枱都冇一個記得，亦唔知佢係乜背景、搞緊乜、有乜做過。包括：嚴剛、蘇長榮、譚岳衡、簡慧敏、顏汶羽、龍漢標、楊
永杰、黃國、黃俊碩、陸瀚民、郭玲麗、張欣宇、陳學鋒、陳紹雄、陳祖恒、陳沛良、陳仲尼、陳月明、梁毓偉、梁熙、梁文廣、梁子穎、洪雯、林筱魯、林素蔚、林振昇、林哲玄、周文港、周小松、吳傑莊、李鎮強、李惟宏、李浩然、李世榮、朱國強。
　　
你話死唔死？成年嘞，唔好話普通市民，連資深傳媒人都唔知佢哋搞過/緊乜？為乜情況會如此？你話呢吓？
　　
是晚結論，只有一個明顯跑出而人人都識的，乃江玉歡！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。