世界盃2022｜專欄:荷阿大戰先諗半場和

日本喺十六強同克羅地亞要踢到十二碼分勝負，最後南野拓實、三笘薰同吉田麻也射失，克羅地亞出綫。《足球小將》嘅熱血故事未能延續落去，當然相當可惜。不過，日本由領先1:0之後，森保一嘅打法仍然偏向保守，到互射十二碼嘅時候，亦睇到「東洋武士」似乎無乜練過十二碼，準備完全唔足。早前有消息指森保一會獲續約，如果「一哥」繼續執教日本隊，「東洋武士」幾難更上一層樓。

艾爾今年睇好嘅荷蘭，喺八強對阿根廷，上演前屆世界盃嘅四強翻版戰。荷蘭上場對美國，完全睇到雲加爾嘅領軍經驗，睇到對方兩閘位置比較鬆散，充分利用杜費斯同白蘭特嘅能力，為荷蘭奠定勝局。艾爾覺得荷蘭今屆球員實力比前屆好啲，打法亦比之前實際。加普今屆表現光芒四射，迪比狀態及時回勇，對球隊進攻非常重要，希望呢隊「橙衫軍團」可以彌補雲加爾嘅遺憾啦！

「潘柏斯雄鷹」阿根廷上仗贏澳洲2:1，早段都踢到應有嘅水準，但下半場尾段有啲鬆散，唔係後防嘅兩位「馬天尼斯」，阿根廷未必咁輕鬆晉級。所以，艾爾希望利辛度馬天尼斯可以繼續打正選，佢嘅穩定程度遠比基斯甸羅美路好，對阿根廷後防好重要。另外，正選擺阿歷斯麥亞里士打同安素費南迪斯嘅效果都唔錯，尤其後者喺中場串連非常關鍵，希望領隊史卡朗尼唔好喺關鍵時刻轉人轉陣。

今場估計阿根廷控球比率較高，荷蘭搵機會打反擊，相信會係一場幾膠着嘅比賽。兩邊領隊相信唔敢輕舉妄動，艾爾先推介半場和，再考慮全場入球大細「2.5」細。　—艾爾

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。